அண்ணா பல்கலைக்கழகத்தின் கீழ் செயல்படும் 11 உறுப்புக் கல்லூரிகளில் தமிழ் மொழியில் செயல்பட்டு வரும் மெக்கானிக்கல் மற்றும் சிவில் பாடப் பரிவுகள் தற்காலிகமாக நீக்கப்பட்டுள்ளன. இதுதொடர்பாக அறிவித்துள்ள அண்ணா பல்கலைக்கழகம் மாணவர் சேர்க்கை இல்லாததால் இந்த நடவடிக்கையை எடுப்பதாக அறிவித்துள்ளது. மேலும் ஆங்கில வழி சிவில் மற்றும் மெக்கானிக்கல் பாடப்பிரிவுகளும் மூடப்படுவதாக அண்ணா பல்கலைக்கழகம் அறிவித்துள்ளது.
இதற்கு தமிழக பாஜக தலைவர் அண்ணாமலை கடும் கண்டனம் தெரிவித்துள்ளார். இதுகுறித்து அவர் பதிவிட்டுள்ள டிவிட்டில், அண்ணா பல்கலைக் கழகத்தின் 11 உறுப்புக் கல்லூரிகளில், தமிழ் வழியில் பொறியியல் கல்வி பாடப்பிரிவுகள் இருந்ததை, இந்த ஆண்டு முதல் தற்காலிகமாக நிறுத்தி வைக்கப்படுவதாக அண்ணா பல்கலைக்கழகம் அறிவித்துள்ள செய்தியறிந்து மிகுந்த அதிர்ச்சியடைந்ததாக தெரிவித்துள்ளார்.
பிரதமர் மோடி கொண்டு வந்த புதிய கல்விக் கொள்கை, நாடு முழுவதும் தாய்மொழிக் கல்வியை வலியுறுத்துகிறது என்றும், மத்திய உள்துறை அமைச்சர் அமித்ஷா தாய் மொழியில் மருத்துவம், பொறியியல் உள்ளிட்ட உயர் கல்விகள் பயிற்றுவிக்கப்பட வேண்டும் என்று அறிவித்து, அதற்கான தொடர் முயற்சிகளிலும் ஈடுபட்டு வருகிறார் என்றும் தெரிவித்துள்ளார்.
ஆனால், தமிழ் மீது பற்று இருப்பதாக
அரசு நாள்தோறும் நாடகமாடிக் கொண்டிருப்பதாக குற்றம்சாட்டியுள்ள அண்ணாமலை, திமுக அரசு தாய்மொழி குறித்து சிறிதும் சிந்திக்காமல், தமிழைத் தொடர்ந்து புறக்கணிக்கும் முயற்சிகளை மேற்கொள்வது வன்மையாகக் கண்டிக்கத்தக்கது என்றும் தெரிவித்துள்ளார். மேலும் மாணவர்களிடையே தாய்மொழிக் கல்வியை ஊக்குவிக்க வேண்டிய அவசியம் இருக்கும்போது, இது போன்ற அறிவிப்புகள் தாய்மொழிக் கல்வியை நீர்த்துப் போகச் செய்கிறது என்றும் அண்ணாமலை தனது டிவிட்டில் விளாசியுள்ளார்.
தமிழ் மொழிப் பொறியியல் பாடப் பிரிவுகள் தற்காலிகமாக நிறுத்தி வைக்கப்பட்டுள்ளது குறித்த ஊடகங்களின் கேள்விக்கு, உயர்கல்வித்துறை அமைச்சர் பொன்முடி, ஒரு மாணவர் கூட தமிழ் வழிக் கல்வி பொறியியல் பிரிவில் சேரவில்லை என்ற மழுப்பலான காரணத்தைத் தெரிவித்துள்ளார் என்று குறிப்பிட்டுள்ள அண்ணாமலை தமிழ் வழிக் கல்வியை ஊக்குவிக்க வேண்டியது மாநில அரசின் கடமை என்றும் அதனைச் செய்யத் தவறியது திமுக அரசின் குற்றம் என்றும் சரமாரியாக விளாசியுள்ளார். திமுக அரசு செய்யாத சாதனைகளுக்காக வீண் விளம்பரங்கள் செய்வதை நிறுத்தி விட்டு, தாய்மொழிக் கல்வியை ஊக்குவிப்பதில் முனைப்பு காட்ட வேண்டும் என்றும் அண்ணாமலை தனது டிவிட்டில் வலியுறுத்தியுள்ளார்.