சென்னை:
கோரமண்டல் ரயில் விபத்தில் பாதிக்கப்பட்டவர்களின் உறவினர்களை விபத்து நடந்த பகுதிக்கு அழைத்துச் செல்ல சிறப்பு ரயிலை தெற்கு ரயில்வே அறிவித்துள்ளது.
மேற்கு வங்க மாநிலம் கொல்கத்தாவின் புறநகர் பகுதியான ஷாலிமர் ரயில் நிலையத்தில் இருந்து சென்னை நோக்கி வந்து கொண்டிருந்த கோரமண்டல் எக்ஸ்பிரஸ் ரயில் ஒடிசாவின் பாலாசோர் அருகே கோர விபத்தில் சிக்கியது. பஹனபஜார் பகுதி அருகே சென்று கொண்டிருந்த போது, எதிரே வந்த சரக்கு ரயில் கோரமண்டல் ரயில் மீது பயங்கர வேகத்தில் மோதியது.
இதில் கோரமண்டல் எக்ஸ்பிரஸ் ரயிலின் 10 பெட்டிகள் தடம்புரண்டு அருகில் உள்ள தண்டவாளத்தில் விழுந்தன. அந்த நேரம் பார்த்து, பெங்களூரில் இருந்து ஹவுரா நோக்கி சென்ற எக்ஸ்பிரஸ் ரயில் அந்த பெட்டிகள் மீது மோதியது. இதில் அந்த பெட்டிகள் நசுங்கின. இடித்த ரயிலும் அங்கேயே கவிழ்ந்தது. இந்த சம்பவத்தை தொடர்ந்து அங்கு தீயணைப்புப் படையினர் சென்று மீட்புப் படையில் ஈடுபட்டு வருகின்றனர்.
தற்போது வரை 261 பேரின் உடல்கள் மீட்கப்பட்டுள்ளதாக அதிகாரப்பூர்வ தகவல்கள் தெரிவிக்கின்றன. 600-க்கும் மேற்பட்டோர் படுகாயங்களுடன் மருத்துவமனைகளில் அனுமதிக்கப்பட்டுள்ளனர். இதில் பலரது நிலைமை கவலைக்கிடமாக இருப்பதாக மருத்துவர்கள் தெரிவித்துள்ளனர். இறந்தவர்களிலும், காயமடைந்தவர்களிலும் பல தமிழர்கள் இருக்கின்றனர். இதுவரை 35 தமிழர்களின் உடல் அடையாளம் காணப்பட்டுள்ளதாக கூறப்படுகிறது.
இந்நிலையில், இந்த விபத்தில் சிக்கியவர்களின் உறவினர்களுக்காக சிறப்பு ரயில் ஒன்றை தெற்கு ரயில்வே அறிவித்துள்ளது. இதுகுறித்து தெற்கு ரயில்வே சார்பில் விடப்பட்ட அறிக்கையின் விவரம்:
விபத்துக்குள்ளான கோரமண்டல் ரயில், யெஷ்வந்த்பூர் – ஹவுரா ரயிலில் பயணித்தவர்களின் உறவினர்களுக்காக 02840 என்ற எண்ணுடைய சிறப்பு ரயில் விடப்பட்டுள்ளது. இந்த ரயிலானது டாக்டர் எம்ஜிஆர் சென்ட்ரல் ரயில் நிலையத்தில் இருந்து இன்று இரவு (ஜூன் 3) 7.20 மணிக்கு புறப்படும்.
இந்த ரயிலானது விபத்து நிகழ்ந்த பத்ரக் பகுதி வரை செல்லும். விபத்தில் பாதிக்கப்பட்டவர்களின் உறவினர்கள் அவர்களுக்கான பாஸ்களை சென்ட்ரல் ரயில் நிலையத்தில் உள்ள ஹெல்ப் டெஸ்க்கில் (Help Desk) இருந்து சற்று முன்பாக வந்து பெற்றுக் கொள்ளலாம். 044- 25330952, 044-25330953 & 044-25354771, 9003061974 and 044 25354148 & 044 25330714 ஆகிய தொலைப்பேசி எண்களை தொடர்புகொண்டு தங்கள் வருகையை பதிவு செய்து கொள்ளலாம்.
இந்த ரயிலில் மற்ற பயணிகளுக்காக ஏசி மற்றும் ஸ்லீப்பர் வகுப்பு பெட்டிகள் ஒதுக்கப்பட்டுள்ளன. அவர்கள் முன்பதிவு செய்து பயணிக்கலாம். இவ்வாறு அந்த செய்திக்குறிப்பில் தெரிவிக்கப்பட்டுள்ளது.