தமிழக பாஜக தலைவரான அண்ணாமலை ஜெயலலிதா முதல்வராக இருந்த போது செய்த ஊழலுக்காக நீதிமன்றத்தால் தண்டிக்கப்பட்டதாக கூறினார். அதனால்தான் தமிழகம் ஊழல் மிகுந்த மாநிலமாக உள்ளது என்றும் கூறியிருந்தார். அவரது இந்த கருத்துக்கு அதிமுக தலைவர்கள் கண்டனம் தெரிவித்து வருகின்றனர்.
சென்னை ராயப்பேட்டையில் உள்ள அதிமுக தலைமை அலுவகலத்தில் கட்சியின் பொதுச்செயலாளர்
எடப்பாடி பழனிசாமி தலைமையில் நடைபெற்ற அதிமுக மாவட்ட செயலாளர்கள் கூட்டத்தில் அண்ணாமலைக்கு எதிராக தீர்மானம் நிறைவேற்றப்பட்டது. மேலும் அண்ணாமலை மீது நடவடிக்கை எடுக்க பாஜக தலைமைக்கு வலியுறுத்தவும் கூட்டத்தில் முடிவு செய்யப்பட்டுள்ளதாக கூறப்படுகிறது.
இந்நிலையில் அமமுக பொதுச் செயலாளரான டிடிவி தினகரன் தஞ்சையில் செய்தியாளர்களிடம் பேசினார். அப்போது தமிழக பாஜக தலைவர் அண்ணாமலைக்கு கண்டனம் தெரிவித்த அவர், அண்ணாமலை அரசியலுக்கு புதியவர் என்பதை அடிக்கடி நிரூபித்து வருகிறார் என்றார்.
மேலும் ஜெயலலிதாவின் ஆளுமை, சாதனைகள் பற்றி எதுவும் தெரியாமல் அண்ணாமலை அறியாமையில் பேசுகிறார் என்றும் பிரதமர் மோடி, முன்னாள் பிரதமர் வாஜ்பாய் உள்ளிட்ட பல முக்கிய பா.ஜ.க தலைவர்கள் ஜெயலலிதாவுடன் அன்புடனும், நட்புடனும் இருந்தார்கள் என்றும் கூறினார். மேலும் 1998 ஆம் ஆண்டு தேர்தலில் பா.ஜ.க.வுடன் கூட்டணி வைத்து தென் நாட்டில் காலூன்ற வாய்ப்பு கொடுத்தது ஜெயலலிதா தான் என்றும் டிடிவி தினகரன் தெரிவித்தார்.
ஏழை எளிய மக்களின் வளர்ச்சிக்காக தன்னை அர்ப்பணித்துக் கொண்டவர் ஜெயலலிதா என்று கூறிய டிடிவி தினகரன், அவருடைய சாதனைகளை பொறுக்க முடியாமல் தான் சிலர் காழ்ப்புணர்ச்சியால் அவர் மீது வழக்கு தொடுத்தனர் என்றும் கூறினார். ஜெயலலிதா மீது தொடரப்பட்ட வழக்குகளை எல்லாம் வென்றால் என்றும், ஜெயலலிதாவின் மரணம் வரை அவரை யாராலும் வெல்ல முடியவில்லை என்றும் டிடிவி தினகரன் தெரிவித்தார்.