சென்னை:
அமைச்சர் செந்தில் பாலாஜிக்கு நடைபெறும் இதய பைபாஸ் அறுவை சிகிச்சையை லைவ் (நேரலை) ஆக காட்ட வேண்டும் என நாம் தமிழர் கட்சியின் தலைமை ஒருங்கிணைப்பாளர்
வலியுறுத்தியுள்ளார்.
பணமோசடி வழக்கில் தமிழக மின்சார மற்றும் மதுவிலக்கு துறை அமைச்சராக இருந்த செந்தில் பாலாஜியை அமலாக்கத்துறை அண்மையில் கைது செய்தது. இதையடுத்து, நெஞ்சு வலி என செந்தில் பாலாஜி கூறியதால் சென்னை ஓமந்தூரார் அரசு மருத்துவமனையில் அனுமதிக்கப்பட்ட அவர், பிறகு காவேரி மருத்துவமனைக்கு மாற்றப்பட்டார். இந்நிலையில், அவருக்கு நாளை அறுவை சிகிச்சை நடக்கவுள்ளதாக சுகாதாரத்துறை அமைச்சர் மா. சுப்பிரமணியன் இன்று தெரிவித்தார்.
இந்நிலையில், இந்த விவகாரம் தொடர்பாக சீமானிடம் செய்தியாளர்கள் இன்று கேள்வியெழுப்பினர். அதற்கு பதிலளித்து அவர் பேசியதாவது:
முதலில் செந்தில்பாலாஜி மருத்துவமனையில் அனுமதிக்கப்பட்டது என்ன சொல்லப்பட்டது.. அவருக்கு உடனே ஆபரேஷன் செய்யணும்னு சொன்னாங்களா இல்லையா? அப்புறம் எதுக்கு 8 நாள் இழுத்தாங்க? அவருக்கு நடக்குற ஆபரேஷனை நேரலையாக ஒளிபரப்ப வேண்டும். உடம்பு சரியில்லைனு சொன்னதற்கு அப்புறம் அதுபற்றி கருத்து கூறுவது சரியாக இருக்காது. அவருக்கு நல்லபடியாக அறுவை சிகிச்சை நடந்து அவர் குணமடைய வேண்டும்.
ஆனால், நீங்க வேணும்னா பாருங்க. உடம்பு சரியில்லை உடம்பு சரியில்லைனு சொல்லியே எல்லோருக்கும் புனிதப் பட்டம் கொடுத்துருவாங்க. அடிச்ச கொள்ளை, பண்ண ஊழல் எல்லாத்தையும் மறைச்சிருவாங்க. அவருக்கு முடியல அவருக்கு முடியலனு சொல்லி சொல்லியே எல்லாத்தையும் மூடிருவாங்க. இவ்வாறு சீமான் கூறினார்.