சென்னை:
போக்குவரத்து நெரிசலால் மூச்சுத் திணறி வரும் தாம்பரத்துக்கு விடிவுகாலம் பிறந்துவிட்டது என்றுதான் சொல்ல வேண்டும். ஆம்., 8 வழி கொண்ட பிரம்மாண்ட மேம்பாலம் தாம்பரத்தை அலங்கரிக்க ரூ.25 கோடி செலவில் ரெடியாகிக் கொண்டிருக்கிறது. எங்கே இந்த மேம்பாலம் வருகிறது.. ஒட்டுமொத்த சென்னைக்கே இந்த மேம்பாலம் எப்படி முக்கியமான ஒன்றாக மாறப்போகிறது என்பது குறித்து இங்கு காண்போம்.
சென்னையை ஸ்தம்பிக்க செய்யும் போக்குவரத்து நெரிசலை குறைப்பதற்காகவே வண்டலூரை அடுத்த கிளாம்பாக்கத்தில் புதிய பேருந்து நிலையத்தை தமிழக அரசு அமைத்துள்ளது. இன்னும் ஓரிரு மாதங்களில் இந்த பேருந்து நிலையம் பயன்பாட்டுக்கு வந்துவிடும்.
இந்த பேருந்து நிலையம் வந்துவிட்டால் ஜிஎஸ்டி சாலையில் கடுமையான வாகன நெரிசல் ஏற்படும் என்பதில் எந்த சந்தேகமும் இல்லை. எனவேதான், கிளாம்பாக்கம் பேருந்து நிலையத்தை திறப்பதற்கு முன்பாக ஜிஎஸ்டி சாலையை தயார்படுத்தும் பணிகள் மும்முரமாக நடைபெற்று வருகின்றன.
பிரம்மாண்ட மேம்பாலம்:
இதனைக் கருத்தில்கொண்டே ஜிஎஸ்டி சாலையின் ஓர் அங்கமான கிண்டி டூ தாம்பரம், பெருங்களத்தூர் டூ பொத்தேரி வரையிலான சாலைகள் போர்க்கால அடிப்படையில் விரிவுப்படுத்தப்பட்டு வருகின்றன. அந்த வகையில், தற்போது சென்னை சிட்டிக்குள் இருந்து கிளாம்பாக்கத்துக்கு வரும் மக்களின் வசதிக்காக ஒரு பிரம்மாண்ட மேம்பாலத்தை தாம்பரத்தில் கட்டமைக்க தேசிய நெடுஞ்சாலை ஆணையம் (NHAI) திட்டமிட்டுள்ளது.
ரூ.25.7 கோடியில் 8 வழி மேம்பாலம்:
தற்போது தாம்பரம் ரயில் நிலையத்துக்கு அருகே உள்ள பிரதான மேம்பாலத்தை இடித்துதான் இந்த பிரம்மாண்ட மேம்பாலம் கட்டப்படவுள்ளது. இப்போது இருக்கும் மேம்பாலமானது வெறும் 4 வழிகளை மட்டுமே கொண்டிருக்கிறது. இதை இடித்துவிட்டு 8 வழி மேம்பாலத்தை கட்ட தேசிய நெடுஞ்சாலை ஆணையம் முடிவு செய்துள்ளது. இந்த புதிய மேம்பாலமானது தாம்பரம் ரயில் நிலையத்தில் இருந்து பெருங்களத்தூர் ரயில் நிலையம் வரை 2.4 கி.மீ. தூரத்துக்கு அமைக்கப்படவுள்ளது. இதற்காக ரூ.25.7 கோடி ஒதுக்கப்பட்டுள்ளது. வரும் 2024-ம் ஆண்டு இறுதிக்குள் இந்த மேம்பாலம் கட்டி முடிக்கப்படும் என நெடுஞ்சாலைத் துறை வட்டாரங்கள் தெரிவிக்கின்றன.
கிளாம்பாக்கம் ரூட் க்ளியர்:
இந்த மேம்பாலம் அமையும் பட்சத்தில் சென்னை நகருக்குள் இருந்து வாகனங்கள் தாம்பரத்தை தொட்டு இந்த மேம்பாலத்தை ஏறியவுடன் அடுத்த 3 நிமிடங்களுக்குள் பெருங்களத்தூரை அடைந்துவிடலாம். பின்னர் பெருங்களத்தூரில் இருந்து நான்கே நிமிடங்களில் கிளாம்பாக்கத்தை அடைந்துவிடலாம். இந்த மேம்பாலத்தால் ஜிஎஸ்டி சாலையில் ஏற்படும் போக்குவரத்து நெரிசலை 80 சதவீதம் தவிர்க்கலாம் என அரசு தரப்பில் தெரிவிக்கப்படுகிறது.
தற்காலிக சாலை:
எனினும், இந்த மேம்பாலம் கட்டுமானப் பணிகள் முடியும் வரை அந்தப் பகுதியில் போக்குவரத்து நெரிசல் அதிக அளவில் ஏற்படும். இதனை சமாளிக்கும் வகையில், மேம்பாலத்தின் இடதுபுறத்தில் வாகனங்களை திருப்பிவிடுவதற்காக (Diversion) தற்காலிக சாலை அமைக்கப்படும் எனக் கூறப்படுகிறது. இந்த மேம்பாலம் கட்டும் மிக விரைவில் தொடங்கப்படவுள்ளதாக தகவலறிந்த வட்டாரங்கள் தெரிவிக்கின்றன.