கடலூர்:
வெளிநாட்டில் இருந்து வந்த மதங்களே இந்தியாவில் பிரச்சினை உருவாக காரணமாக இருந்தது என்று தமிழக ஆளுநர் ஆர்.என். ரவி கூறியுள்ளது பெரும் சர்ச்சையை ஏற்படுத்தியுள்ளது.
கடலூர் மாவட்டம் வடலூரில் வள்ளலாரின் 200-வது ஜெயந்தி விழா நடைபெறுகிறது. இந்த விழாவில் தமிழக ஆளுநர் ஆர்.என். ரவி சிறப்பு விருந்தினராக கலந்து கொண்டார். நிகழ்ச்சியில் அவர் பேசியதாவது:
உலகின் மிகப்பெரிய ஞானிகளில் ஒருவரான 200-வது ஜெயந்தி விழாவில் கலந்துகொள்வதில் மகிழ்ச்சி அடைகிறேன். நான் ஒரு சனாதன தர்மத்தின் மாணவன். பல ரிஷிகளின் நூல்களை படித்தவன். எனினும், வள்ளலாரின் நூல்களை படித்த போது நான் பிரம்மிப்படைந்தேன். அத்தனை பெரிய கருத்துகளை வள்ளலார் கூறி இருக்கிறார். வள்ளலாரை படிக்கும் போது ஒன்று தெளிவாக புரிந்தது. 10,000 வருட சனாதனத்தின் உச்ச நட்சத்திரம் வள்ளலார் என்ற உண்மைதான் அது.
வாடிய பயிரை கண்ட போதெல்லாம் வாடினேன் என்ற வள்ளலாரின் வரிகள் சனாதனத்தின் எதிரொலி அல்லாமல் வேறு என்னவாக இருக்க முடியும்.. அறியாமையாலும், காழ்ப்புணர்ச்சியாலும் சனாதன தர்மத்தை சிலர் தவறாக நினைக்கிறார்கள். நமது பாரத நாடே சனாதன தர்மத்தால் ஆனது. வெளிநாட்டில் இருந்து வந்த மதங்களாலும், வழிபாட்டு முறையாலும் நமது சனாதன தர்மத்தின் அடையாளம் மறைந்து போனது.
பாரத பண்பாட்டில் சிறு தெய்வம், பெரும் தெய்வ வழிபாடுகள் இருந்தன. ஆனால் எந்த சச்சரவும் இல்லாமல்தான் மக்கள் இருந்தார்கள். வெளியில் இருந்து வந்த மதங்கள், எங்கள் மதம்தான் பெரியது எனக் கூறிய போதுதான், பிரச்சினை ஏற்பட்டது. பிஷப் போப், கால்வெல் போன்றவர்கள்தான் நமது அடையாளத்தை அழிக்க வேண்டும் என நினைத்தவர்கள். கார்ல் மார்க்ஸ் என்ற அறிஞர் ஆங்கிலேயேருக்கு உதவி செய்தார்.
அவர் 1852-ம் ஆண்டு நியூயார்க் டைம்ஸ் பத்திரிகையில் இந்தியா குறித்து ஒரு கட்டுரை எழுத்தியுள்ளார். அதில், இந்தியாவில் சமூக கட்டமைப்பே இருக்கக்கூடாது என்றும், அதை குலைக்க வேண்டும் எனவும் எழுதியுள்ளார். மேலும், இந்தியர்களுக்கு அறிவு கிடையாது, அவர்கள் நாகரீகமற்றவர்கள் எனவும் அவர் எழுதி இருக்கிறார். ஆனால் இன்றைக்கு இந்த உலகமே நமது பாரத பிரதமரின் பேச்சை எதிர்பார்த்து கவனிக்கிறது. இந்தியா விரைவில் வல்லசராகி உலகையே வழிநடத்தும். இவ்வாறு ஆர்.என். ரவி பேசினார்.
ஜாதி, மத வேறுபாடுகளை களைந்து அனைத்து தரப்பினரின் நலனுக்காகவும் பாடுபட்ட மகா துறவி வள்ளலாரை, ஜாதிய படிநிலைகளை தூக்கிப்பிடிக்கும் சனாதன தர்மத்தின் உச்ச நட்சத்திரம் எனக் கூறுவதா என ஆளுநர் ரவியை பலரும் சமூக வலைதளங்களில் விமர்சித்து வருகின்றனர்.