அதிமுக பொதுக்குழுவை எதிர்த்து நீதிமன்றத்தை நாடிய ஓ.பன்னீர் செல்வத்துக்கு அடுத்தடுத்து சறுக்கல்கள் நேர்ந்த நிலையில் உச்ச நீதிமன்ற தீர்ப்பும் எடப்பாடி பழனிசாமிக்கு ஆதரவாகவே இருந்தது.
அதிமுக பொதுக்குழு தீர்மானங்கள் செல்லுமா?
இந்தநிலையில், அதிமுக பொதுக்குழு தீர்மானங்களை எதிர்த்து சென்னை உயர்நீதிமன்றத்தில் ஓ.பன்னீர் செல்வம் மற்றும் அவரது ஆதரவாளர்களான மனோஜ் பாண்டியன், வைத்திலிங்கம், ஜேசிடி பிரபாகர் உள்ளிட்டோர் வழக்கு தொடர்ந்தனர். இந்த வழக்கை விசாரித்த தனி நீதிபதி குமரேஷ் பாபு பொதுக்குழு தீர்மானங்கள் செல்லும் என்று உத்தரவிட்டார்.
இரு நீதிபதிகள் அடங்கிய அமர்வு!
தனி நீதிபதி உத்தரவை எதிர்த்து இரண்டு நீதிபதிகள் கொண்ட அமர்வில் ஓ.பன்னீர் செல்வம் தரப்பினர் மனுத்தாக்கல் செய்தனர். இந்த வழக்கை நீதிபதிகள் மகாதேவன், முகமது ஷபிக் அடங்கிய அமர்வு விசாரித்து வந்தது. இரண்டு தரப்பிலும் வாதங்கள் நிறைவடைந்த நிலையில் எழுத்துப்பூர்வமான வாதங்களை தாக்கல் செய்ய நீதிபதிகள் உத்தரவிட்டனர். இந்தநிலையில் இரண்டு தரப்பும் இன்று (ஜூன் 28) எழுத்துப்பூர்வமான வாதத்தை தாக்கல் செய்துள்ளனர்.
தரப்பு வாதம்!
ஓபிஎஸ் தரப்பில் தாக்கல் செய்யப்பட்டுள்ள எழுத்துப்பூர்வமான வாதத்தில், “இந்த வழக்கில் நிவாரணம் கிடைக்கவில்லை என்றால் எங்களுக்கு பாதிப்பு ஏற்படும். ஒருங்கிணைப்பாளர், இணை ஒருங்கிணைப்பாளர் பதவிகள் காலாவதியாகிவிட்டதாக எந்த நீதிமன்றமும் கூறவில்லை. தான் ஒருங்கிணைப்பாளராக செயல்படுவதை எடப்பாடி பழனிசாமியால் தடுக்க முடியாது. இடைக்கால தடை மூலமாக இதனை உறுதி செய்ய வேண்டும்” என்று தெரிவிக்கப்பட்டது.
தரப்பு வாதம்!
எடப்பாடி பழனிசாமி தரப்பில் தாக்கல் செய்யப்பட்ட வாதத்தில், “ஓபிஎஸ் உள்ளிட்ட அவரது ஆதரவாளர்களை கட்சியிலிருந்து ஜூலை 11, 2022-ஆம் ஆண்டு நீக்கி தீர்மானம் நிறைவேற்றப்பட்டது. 8 மாதங்கள் மெளம் காத்த மனுதாரர்கள் தற்போது தீர்மானத்திற்கு தடை கோர உரிமையில்லை. 2022-ஆம் ஆண்டு ஜூலை 11-ஆம் தேதி நடைபெற்ற பொதுக்குழுவிற்கு எந்த நீதிமன்றமும் தடை விதிக்கவில்லை. தீர்மானத்தின் அடிப்படையில் தான் கட்சி செயல்பட்டு வருகிறது. கால தாமதமாக தாக்கல் செய்யப்பட்ட இந்த வழக்கு செல்லத்தக்கதல்ல” என்று தெரிவித்திருந்தனர்.
தீர்ப்பு ஒத்திவைப்பு!
இரண்டு தரப்புகளின் எழுத்துப்பூர்வமான வாதங்களை பதிவு செய்த நீதிபதிகள் வழக்கின் தீர்ப்பை தேதி குறிப்பிடாமல் ஒத்திவைத்துள்ளனர்.