தென்மேற்கு பருவமழை சூடுபிடிக்க தொடங்கியுள்ளது. இதனால் கேரளா மற்றும் கர்நாடகாவில் பல பகுதிகளில் பரவலாக நல்ல மழை பெய்து வருகிறது. மேற்கு தொடர்ச்சி மலைப் பகுதியை ஒட்டிய தமிழகத்தின் பல்வேறு பகுதிகளிலும் மழை பெய்து வருகிறது. கேரளாவில் வரும் நாட்களில் மழையின் தீவிரம் அதிகமாக இருக்கும் என இந்திய வானிலை மையம் எச்சரித்துள்ளது.
பல மாவட்டங்களுக்கு ஆரஞ்ச் எச்சரிக்கை விடுக்கப்பட்டுள்ளது. கோழிக்கோடு மாவட்டத்தில் புதன்கிழமை கனமழை பெய்யும் என தெரிவிக்கப்பட்டுள்ளது. கோழிக்கோடு, கண்ணூர், காசர்கோடு உள்ளிட்ட மாவட்டங்களுக்கு ஆரஞ்சு எச்சரிக்கை விடுக்கப்பட்டுள்ளது. ஆலப்புழா, எர்ணாகுளம், திருச்சூர் ஆகிய மாவட்டங்களுக்கு மஞ்சள் எச்சரிக்கை விடுக்கப்பட்டுள்ளது.
இந்நிலையில் தமிழ் நாடு வெதர்மேன் கேரளா மற்றும் நீலகிரி மாவட்ட மழை நிலவரம் குறித்து பதிவிட்டுள்ளார். அதன்படி வரும் 3ஆம் தேதி முதல் 9 ஆம் தேதி வரை கேரளா மாநிலத்தின் சில பகுதிகள் மற்றும் நீலகிரியின் பல பகுதிகளுக்கு செல்ல வேண்டாம் என எச்சரித்துள்ளார்.
இதுதொடர்பாக அவர் பதிவிட்டுள்ள டிவிட்டில், கேரளா மற்றும் காவிரி நீர்ப்பிடிப்பு பகுதிகள், அவலாஞ்சி-முகூர்த்தி-அப்பர் பவானி, பந்தலூர்-கூடலூர் வால்பாறை, கன்னியாகுமரி ஆகிய பகுதிகளில் ஜூலை 3 ஆம் தேதி முதல் 9ஆம் தேதி பருவமழையின் மிகப்பெரிய சம்பவம் நடைபெற உள்ளதாக கூறியுள்ளார்.
இந்த காலகட்டத்தில் வால்பாறை, வயநாடு, இடுக்கி, குடகு, கூடலூர் போன்ற நீலகிரி பகுதிகளில் உள்ளிட்ட பகுதிகளுக்கு செல்வதை தவிர்த்து விடுங்கள் என பதிவிட்டுள்ளார். தமிழ்நாடு வெதர்மேனின் மழை முன்னறிவிப்புகள் பெரும்பாலும் ஒத்துபோவதால், ஜூலை 3 ஆம் தேதி முதல் 9 ஆம் தேதி வரை கேரளா மற்றும் நீலகிரி பகுதிகளில் கனமழை இருக்கும் என எதிர்பார்க்கப்படுகிறது.