சென்னை:
தமிழ்நாட்டில் பொறியியல் கலந்தாய்வு தள்ளிக்கொண்டே போவது மாணவர்களை குழப்பத்தில் ஆழ்த்தியுள்ளது. அதே சமயத்தில், பொறியியல் கலந்தாய்வை இழுத்தடிப்பதற்கான காரணமும் தெரியவந்துள்ளது.
பன்னிரெண்டாம் வகுப்பு பொதுத்தேர்வு கட் ஆஃப் மதிப்பெண்கள் அடிப்படையில், பொறியியல் கல்லூரிகளில் இடமளிக்க கலந்தாய்வு (கவுன்சிலிங்) நடத்தப்படுவது வழக்கம். அந்த வகையில், நடப்பாண்டு பொறியியல் கவுன்சிலிங் ஜூன் மாதமே நடத்தப்படும் என தமிழக உயர்கல்வித்துறை முன்பு அறிவித்தது. ஆனால், மருத்துவப் படிப்புகளுக்கான மாணவர் சேர்க்கை முடிந்த பிறகே பொறியியல் கலந்தாய்வு தொடங்கும் என உயர்கல்வித்துறை அமைச்சர் பொன்முடி அறிவித்தார். இதனால் பொறியியல் கலந்தாய்வுக்கான தேதி தள்ளிக்கொண்டே போவதால் மாணவர்கள் குழப்பம் அடைந்துள்ளனர்.
அதே சமயத்தில், மருத்துவக் கலந்தாய்வுக்கு விண்ணிப்பிக்க ஜூலை 10-ம் தேதி வரை அவகாசம் அளிக்கப்பட்டது. நேற்றுடன் அந்த தேதி முடிவடைந்துவிட்டது. இனி அகில இந்திய அளவிலான மருத்துவ இடங்களுக்கும், மாநில அளவிலான மருத்துவ இடங்களுக்கும் கலந்தாய்வு நடைபெறும். இது ஜூலை இறுதி வரை நீடிக்கும் என எதிர்பார்க்கப்படுகிறது. இந்தக் கலந்தாய்வு முடிந்த பின்னரே பொறியியல் கல்லூரிகளில் கலந்தாய்வு தொடங்கப்படும் என உயர்கல்வித்துறை வட்டாரங்கள் தெரிவிக்கின்றன. அதாவது ஆகஸ்ட் முதல் வாரம் அல்லது இரண்டாம் வாரத்தில் பொறியியல் கலந்தாய்வு தொடங்கப்படும் எனக் கூறப்படுகிறது.
இந்நிலையில், பொறியியல் கலந்தாய்வு இவ்வாறு தள்ளிப்போவதற்கான காரணம் தற்போது தெரியவந்துள்ளது. இதுகுறித்து கல்வியாளர்கள் கூறியதாவது:
மாணவர்களின் கட் ஆஃப் உயர்த்தப்படவுள்ளதால் இந்த ஆண்டு கடுமையான போட்டி இருக்கும். நிறைய மாணவர்கள் பொறியியல் படிப்புக்கும், மருத்துவப் படிப்புக்கும் ஒரே நேரத்தில் விண்ணப்பித்து இருக்கிறார்கள். ஒருவேளை, பொறியியல் கலந்தாய்வு முன்கூட்டியே நடந்தால், மருத்துவக் கல்லூரியில் சேர விருப்பமுள்ள மாணவர்கள், பொறியியல் கல்லூரிகளில் இடம் கிடைத்த போதிலும், அதிலிருந்து சென்றுவிடுவார்கள்.
கடந்த ஆண்டும் இதுபோலவே பல மாணவர்கள் பொறியியல் கல்லூரிகளில் இருந்து மருத்துவக் கல்லூரிகளுக்கு சென்றுவிட்டார். இதனை தடுக்கவே பொறியியல் கலந்தாய்வு தள்ளிப்போடப்படுகிறது எனக் கூறுகின்றனர்.