மார்வெல் ரசிகர்களால் மிகவும் எதிர்பார்க்கப்பட்ட `The Marvels’ திரைப்படம் தீபாவளியை முன்னிட்டு நவம்பர் 10ம் தேதி ஆங்கிலம், தமிழ், தெலுங்கு, இந்தி உள்ளிட்ட மொழிகளில் திரையரங்குகளில் வெளியாகிறது.
நியா டகோஸ்டா இயக்கத்தில் ப்ரீ லார்சன், டெயோனா பாரிஸ், இமான் வெல்லனி, சாமுவேல் ஜாக்சன் உள்ளிட்டோர் நடிப்பில் இப்படம் உருவாகியுள்ளது. கடந்த ஆண்டு டிஸ்னி+ ஹாட்ஸ்டாரில் வெளியான ‘மிஸ் மார்வெல்’ வெப் சீரிஸ் பெண் கதாபாத்திரத்தை மையமாகக் கொண்ட தொடராக இருந்தது. இதையடுத்து இந்த ‘The Marvels’ படத்தில் முதல் முறையாக கேப்டன் மார்வெல், மிஸ் மார்வெல் மற்றும் மோனிகா ரேம்போ ஆகிய மூன்று பெண் சூப்பர் ஹீரோக்களை ஒன்றிணைத்துள்ளது மார்வெல் நிறுவனம். இதன் டிரெய்லர் அண்மையில் வெளியாகி மார்வெல் ரசிகர்களின் எதிர்பார்ப்பை எகிறச் செய்துள்ளது. மார்வெல் யுனிவெர்ஸில் (MCU) மூன்று பெண் சூப்பர் ஹீரோக்கள் ஒன்றிணையும் முதல் திரைப்படமும் இதுவே.
இதுபற்றி கூறும் ‘மிஸ் மார்வெல்’ சிரீஸின் நாயகி இமான் வெல்லணி பேசுகையில், “இப்படம் முழுக்க முழுக்கப் பெண் சூப்பர் ஹீரோக்களை மையமாக வைத்து எடுக்கப்பட்டுள்ளது. நாங்கள் உண்மையிலேயே அதிர்ஷ்டசாலிகள். பாலின அடையாளத்தைப் பொருட்படுத்தாமல், இப்படிச் சக்திவாய்ந்த பெண் கதாபாத்திரங்களை உலகம் முழுவதும் கொண்டுசேர்ப்பதுதான் மார்வெல்லின் ஆசை என்று நான் கருதுகிறேன். நிச்சயமாக மக்கள் இதை அங்கீகரித்து, இக்கதாபாத்திரங்களுக்கு பெரும் வரவேற்பை அளிப்பார்கள்” என்று கூறியுள்ளார்.