வடகிழக்கு இந்தியாவும், வட இந்தியாவும் கலவர பூமியாக மாறியிருக்கிறது. முதலில் மணிப்பூர் வன்முறை 2 மாதங்களுக்கு மேல் தொடர்ந்து கட்டுக்கடங்காத மோசமான சம்பவங்கள் அரங்கேறி வருகின்றன. இன்னும் நிலைமை கட்டுக்குள் வரவில்லை. அப்படியிருக்கையில் ஹரியானா மாநிலத்தில் புதிதாக கலவரம் வெடித்துள்ளது. இதனால் அம்மாநிலத்தில் பதற்றம் தொற்றிக் கொண்டது.
விஷ்வ ஹிந்து பரிஷத் யாத்திரை
அதாவது, குருகிராம் அடுத்துள்ள நூ பகுதியில் விஷ்வ ஹிந்து பரிஷத் சார்பில் யாத்திரை ஒன்றுக்கு ஏற்பாடு செய்யப்பட்டிருந்தது. இதற்கு ”பிரிஜ் மண்டல் ஜலாபிஷேக் யாத்ரா” என்று பெயரிடப்பட்டுள்ளது. இதனை குருகிராம் சிவில் லைன்ஸில் இருந்து பாஜக மாவட்டத் தலைவர் கார்கி கக்கார் தொடங்கி வைத்தார். இந்நிலையில் கேத்லா மோட் அருகே யாத்திரை சென்று கொண்டிருந்த போது, இளைஞர்கள் கும்பல் ஒன்று குறுக்கிட்டது.
வழி மறித்த இளைஞர்கள் கூட்டம்
அவர்கள் யாத்திரையை தொடர அனுமதிக்கவில்லை எனச் சொல்லப்படுகிறது. இதையடுத்து இரு தரப்பிற்கும் இடையில் மோதல் உருவானது. நிலைமை கைமீறிச் சென்று கல்வீச்சு சம்பவங்கள் அரங்கேறின. அங்கிருந்த கார்களுக்கு தீவைக்கப்பட்டது. சம்பவம் குறித்து தகவலறிந்து போலீசார் விரைந்து வந்தனர். அவர்கள் கண்ணீர் புகைக் குண்டுகளை வீசி கலவரத்தை ஒடுக்க முயற்சித்தனர். திடீரென வன்முறையாளர்கள் போலீசார் மீதும் தாக்குதல் நடத்த தொடங்கினர்.
பலி, 144 தடை, இணையச் சேவை துண்டிப்பு
அதில் ஹோம் கார்டு ஜவான் ஒருவர் உயிரிழந்தார். டி.எஸ்.பிக்கு தலையில் காயம் ஏற்பட்டது. மேலும் பல போலீசார் காயமடைந்துள்ளனர். நூ சுற்றுவட்டாரப் பகுதிகளில் பதற்றம் அதிகரித்துள்ளதால் 144 தடை உத்தரவு பிறப்பிக்கப்பட்டுள்ளது. இந்த உத்தரவை குருகிராம் மாவட்டத்திலும் பிறப்பித்துள்ளனர். மேலும் இணையச் சேவையும் துண்டிக்கப்பட்டிருக்கிறது. மோதல் சம்பவங்களில் பலர் படுகாயமடைந்து சிகிச்சைக்காக மருத்துவமனைகளில் அனுமதிக்கப்பட்டுள்ளனர்.
தவிக்கும் 2,500 பேர்
இதற்கிடையில் யாத்திரையில் பங்கேற்ற பெண்கள் உள்ளிட்டோர் நல்ஹார் மந்திரில் இருந்து வெளியேற முடியாமல் தவித்து வருவதாக தகவல்கள் தெரிவிக்கின்றன. இவர்கள் காவல் நிலையம் மற்றும் கோயில்களில் தஞ்சமடைந்துள்ளனர். சுமார் 2,500 பேர் செல்ல இடமின்றி தவித்து வருவதாக கூறப்படுகிறது. எதற்காக மேற்குறிப்பிட்ட இளைஞர்கள் கூட்டம் திடீரென வந்து விஷ்வ ஹிந்து பரிஷத் யாத்திரையை தடுத்தனர் என்ற கேள்வி எழுகிறது.
மணிப்பூர் கலவரம் குறித்து விசாரணை… 3 பேர் கொண்ட குழு அமைத்த மத்திய அரசு..முழு விவரம் என்ன? வீடியோவில் பார்க்கலாம்.
பஜ்ரங் தள் வெளியிட்ட சர்ச்சை வீடியோ
இதுபற்றி விசாரிக்கையில், பல்லாப்காரை சேர்ந்த பஜ்ரங் தள் ஆதரவாளர்கள் சிலர் வீடியோ ஒன்றை சமூக வலைதளங்களில் பதிவேற்றம் செய்துள்ளனர். இதில் சர்ச்சைக்குரிய விஷயங்கள் இருந்ததாக தெரிகிறது. இதனால் தான் யாத்திரையை தடுத்து, மோதல் வெடித்து, நூ பகுதி வன்முறை களமாகியிருக்கிறது. நூ பகுதியை தங்கள் கட்டுக்குள் கொண்டு வந்ததை உறுதி செய்யும் வகையில் போலீசார் அணிவகுப்பு நடத்தி அமைதியை கொண்டு வரும் முயற்சியில் ஈடுபட்டனர்.
பல மாவட்டங்களுக்கு பரவிய வன்முறை
ஆனால் விஷயம் இத்துடன் முடிவுக்கு வரவில்லை. குர்கான், ஃபரிதாபாத், பல்வால் ஆகிய மாவட்டங்களுக்கும் வன்முறை பரவியுள்ளது. அதாவது, விஷ்வ ஹிந்து பரிஷத் மற்றும் பஜ்ரங் தள் ஆகிய இரண்டு அமைப்பினருக்கு இடையிலான மோதலாக பார்க்கப்படுகிறது. எனவே நிலைமையை கட்டுக்குள் கொண்டு வர நூவை சுற்றியுள்ள மாவட்டங்களில் கூடுதல் பாதுகாப்பு படை வீரர்கள் குவிக்கப்பட்டுள்ளனர். ஹெலிகாப்டர் மூலம் விரைவாக வீரர்களை அனுப்பி வைக்க ஏற்பாடுகள் முடுக்கி விடப்பட்டுள்ளன.
பாதுகாப்பு படை வீரர்கள் குவிப்பு
தற்போது குர்கான், ஃபரிதாபாத், பல்வால் ஆகிய மாவட்டங்களில் ஆயிரத்திற்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர். இந்நிலையில் ஹரியானா மாநில உள்துறை அமைச்சர் அனில் விஜ் செய்தியாளர்களிடம் பேசுகையில், நூ மற்றும் அதனை ஒட்டியுள்ள மாவட்டங்களில் பாதுகாப்பு படை வீரர்கள் குவிக்கப்பட்டுள்ளனர். மத்திய பாதுகாப்பு படையை சேர்ந்த மூன்று கம்பெனி வீரர்கள் ஹெலிகாப்டர் மூலம் அனுப்பி வைக்கப்பட்டுள்ளனர்.
முதலமைச்சர் கட்டார் கோரிக்கை
வதந்திகள் எதுவும் பரவாமல் தடுக்கும் வகையில் இணையச் சேவை துண்டிக்கப்பட்டுள்ளது என்றார். மேலும் பொதுமக்கள் அமைதி திரும்ப முழு ஒத்துழைப்பு வழங்க வேண்டும் என்று அமைச்சர் அனில் விஜ் கோரிக்கை விடுத்தார். இதேபோல் ஹரியானா முதலமைச்சர் எம்.எல்.கட்டாரும் அமைதி மீண்டும் வர உரிய நடவடிக்கை எடுக்க வலியுறுத்தியுள்ளார்.