சென்னை உயர் நீதிமன்றத்தில் விதிக்கப்பட்ட தீர்ப்பை எதிர்த்து செந்தில் பாலாஜி உச்ச நீதிமன்றத்தில் தொடர்ந்த மேல்முறையீடு வழக்கு தள்ளுபடி செய்யப்பட்டுள்ளது.
செந்தில் பாலாஜி கைது செல்லும் என்று உச்ச நீதிமன்றம் இன்று தீர்ப்பு வழங்கியுள்ளது.
அமைச்சர் செந்தில் பாலாஜி தொடர்புடைய இடங்களில் மே 13ஆம் தேதி அமலாக்கத்துறை சோதனை செய்தது. சோதனையின் முடிவில் அன்று நள்ளிரவு அமலாக்கத்துறை செந்தில் பாலாஜியை கைது செய்தது. தொடர்ந்து அவருக்கு நெஞ்சு வலி ஏற்பட்டதால் அவர் ஓமந்தூரார் அரசு மருத்துவமனையில் அனுமதிக்கப்பட்டார்.
பின்னர் சென்னை உயர் நீதிமன்ற உத்தரவைப் பெற்று தனியார் மருத்துவமனைக்கு மாற்றப்பட்டார். அங்கு அவருக்கு பைபாஸ் அறுவை சிகிச்சை மேற்கொள்ளப்பட்டது.
செந்தில்பாலாஜியை கைது செய்ய அமலாக்கத்துறைக்கு அதிகாரம் இல்லை என்றும், அவரை கைது செய்த போது சட்ட நடைமுறைகள் பின்பற்றப்படவில்லை என்றும் சென்னை உயர் நீதிமன்றத்தில் செந்தில் பாலாஜி தரப்பு வழக்கு தொடர்ந்தது. இரு நீதிபதிகள் அடங்கிய அமர்வில் இந்த வழக்கு விசாரிக்கப்பட்டது. இரு நீதிபதிகளும் மாறுபட்ட தீர்ப்பு வழங்கிய நிலையில் மூன்றாவது நீதிபதியும் விசாரித்து தீர்ப்பு வழங்கினார்.
நீதிபதி நிஷா பானு தவிர எஞ்சிய இரு நீதிபதிகளும் அமலாக்கத்துறை செந்தில் பாலாஜியை கைது செய்தது செல்லும் என்றும் உரிய சட்டநடைமுறைகள் பின்பற்றப்பட்டே கைது செய்யப்பட்டதாக தீர்ப்பு வழங்கினர்.
செந்தில் பாலாஜி வழக்கில் சிக்கல் என்ன உடைத்து பேசிய முத்தலீஃ
இந்த தீர்ப்பை எதிர்த்து செந்தில் பாலாஜி உச்ச நீதிமன்றத்தில் மேல்முறையீடு செய்தார். அது தொடர்பான விசாரணை நடைபெற்று வந்த நிலையில் இன்று தீர்ப்பு வழங்கப்பட்டது.
உச்ச நீதிமன்ற நீதிபதிகள் எம்.எம்.சுந்தரேஷ், ஏ.எஸ்.போபன்னா அமர்வு இன்று தீர்ப்பு வழங்கியது. “செந்தில் பாலாஜியை கைது செய்ய அமலாக்கத்துறைக்கு அதிகாரம் உள்ளது. அவரை கைது செய்த போது உரிய சட்ட நடைமுறைகள் பின்பற்றப்பட்டன. செந்தில் பாலாஜியை காவலில் எடுத்து விசாரிப்பது அமலாக்கத்துறையின் உரிமையும் கடமையும் ஆகும்.
செந்தில் பாலாஜியை ஆகஸ்ட் 12 வரை ஐந்து நாள்கள் காவலில் எடுத்து விசாரிக்க அனுமதியளிக்கப்படுகிறது” என்று நீதிபதிகள் தங்கள் தீர்ப்பில் குறிப்பிட்டுள்ளனர்.
மே 13ஆம் தேதி நள்ளிரவு கைது செய்யப்பட்ட போதும் தற்போது வரை செந்தில் பாலாஜியை அமலாக்கத்துறை விசாரிக்கவில்லை. புழல் சிறையில் அடைக்கப்பட்டிருந்தாலும் அவர் அங்குள்ள மருத்துவமனையில் அனுமதிக்கப்பட்டிருக்கிறார். இந்நிலையில் உச்ச நீதிமன்றம் அவரை காவலில் எடுத்து விசாரிக்க அனுமதி வழங்கியுள்ளதால் அவரை அமலாக்கத்துறை இன்று கஸ்டடியில் எடுத்து விசாரிக்க உள்ளது.