அமெரிக்காவின் கலிஃபோர்னியா மாகாணத்தில் தன் சொந்த கடைக்கு முன் LGBTQ சமூகத்தின் கொடியை ஏற்றியிருந்த பெண் ஒருவர் சுட்டுக்கொல்லப்பட்ட சம்பவம் பெரும் பரபரப்பை ஏற்படுத்தியிருக்கிறது.
இந்த சம்பவம் தொடர்பாக வெளியான தகவலின்படி சுட்டுக்கொல்லப்பட்ட நபரின் பெயர் லாரா ஆன் கார்லேடன் (Laura Ann Carleton) என்று தெரியவந்திருக்கிறது. 66 வயதாகும் இந்தப் பெண், சான் பெர்னார்டினோ கவுண்டி பகுதியில் சிறிய துணிக்கடை ஒன்றை நடத்தி வந்திருக்கிறார்.
இந்த நிலையில் கடந்த வெள்ளிக்கிழமை மாலை ஐந்து மணியளவில் அவரின் கடைக்கு வந்த மர்ம நபர் ஒருவர், கடைக்கு முன் LGBTQ சமூகத்தின் கொடி இருப்பது தொடர்பாக லாரா ஆன் கார்லேடனுடன் வாக்குவாதத்தில் ஈடுபட்டிருக்கிறார். வாக்குவாதம் ஒருகட்டத்தில் இருவருக்கும் அதிகமாக முற்றவே, அந்த மர்ம நபர் தன்னிடமிருந்த துப்பாக்கியை எடுத்து லாரா ஆன் கார்லேடனைச் சுட்டுவிட்டு அங்கிருந்து ஓடிவிட்டார். இதுபற்றி போலீஸார் தகவலறிந்து சம்பவ இடத்துக்கு வந்து பார்த்தபோது, லாரா ஆன் கார்லேடன் அங்கு துரதிர்ஷ்டவசமாக உயிரிழந்து கிடந்தார்.
அதையடுத்து அந்த மர்ம நபரைத் தேடிய போலீஸ் அதிகாரிகள், சம்பவம் நடந்த இடத்திலிருந்து சுமார் ஒரு மைல் தொலைவில் அந்த நபரைக் கண்டுபிடித்தனர். அப்போது போலீஸார் அந்த நபரைக் கைதுசெய்ய முயற்சி செய்தபோது, அந்த நபர் துப்பாக்கியால் சுட முயன்றதால், போலீஸார் பதிலுக்கு என்கவுன்டர் செய்தனர். இதில் அந்த மர்ம நபர் அங்கேயே இறந்துவிட்டார். பின்னர், அந்த மர்ம நபர் எதற்காக அந்தப் பெண்னை சுட்டுக்கொன்றார் என்பது பற்றி அதிகாரியொருவர், “லாரா ஆன் கார்லேடன் தன்னுடைய கடைக்கு முன் LGBTQ கொடி வைத்திருந்தது அந்த நபருக்குப் பிடிக்கவில்லை. இறுதியில், லாரா ஆன் கார்லேடனை சுடுவதற்கு முன் LGBTQ கொடியைப் பற்றி தகாத வார்த்தையில் திட்டினார்” என்று தெரிவித்தார்.
இருப்பினும் அந்த நபரின் அடையாளம் மற்றும் தகவல்களை போலீஸார் இன்னும் வெளியிடவில்லை. அதேசமயம், லாரா ஆன் கார்லேடன் பற்றிய தகவலில், கணவர் மற்றும் ஒன்பது குழந்தைகளுடன் வசித்துவந்த அவர் LGBTQ சமூகத்தின் உறுப்பினராக இல்லையென்றாலும் கூட, அந்த சமூகத்தைச் சேர்ந்தவர்களுக்குத் தொடர்ந்து பல உதவிகளைச் செய்துவந்திருக்கிறார் என்று தெரியவருகிறது.
Junior vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும் https://bit.ly/3OITqxs
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/3OITqxs