தமிழ்நாடு மற்றும் கர்நாடகா இடையே மீண்டும் ஒருமுறை காவிரி பிரச்னை விஸ்வரூபம் எடுத்துள்ளது. காவிரி நீர் பிடிப்பு பகுதிகளில் நல்ல மழை பெய்த போதிலும் தமிழகத்திற்கு ஆகஸ்ட் மாதத்திற்கு வேண்டிய 39.7 டிஎம்சி நீரை தர மறுத்து முரண்டு பிடித்து வருகிறது கர்நாடகா.
இதுதொடர்பாக காவிரி மேலாண்மை ஆணையக் கூட்டத்தில் இருந்து வெளிநடப்பு செய்த தமிழ்நாடு அரசு, உச்சநீதிமன்றத்தை நாடியது. இதனிடையே தமிழகத்திற்கு கடந்த வாரத்தில் தண்ணீர் திறந்துவிட்டது கர்நாடகா. தற்போது கர்நாடகாவில் இருந்து விநாடிக்கு 1900 கன அடி தண்ணீர் திறக்கப்படுவதாக தகவல் வெளியாகியுள்ளது.
காவிரி நீர் தொடர்பான வழக்கை விசாரித்த உச்சநீதிமன்றம் இரு மாநிலங்களின் கோரிக்கைகளை பரிசீலித்து பிரமாணப் பத்திரம் தாக்கல் செய்ய காவிரி மேலாண்மை ஆணையத்திற்கு உத்தரவிட்டது. இந்த நிலையில் காவிரி ஒழுங்காற்று குழு கூட்டம் டெல்லியில் இன்று நடைபெற்றது. இதில் தமிழ்நாடு, கர்நாடகா, புதுச்சேரி மாநில அதிகாரிகள் காணொலி வாயிலாக கலந்துகொண்டனர்.
இந்த கூட்டத்தில் எடுக்கப்பட்ட முடிவின் அடிப்படையில் காவிரியில் கர்நாடக அரசு தற்போது திறக்கும் 1900 கன அடியுடன் கூடுதலாக 3,100 கன அடி சேர்த்து மொத்தம் 5,000 கன அடி தண்ணீர் திறந்துவிட வேண்டுமென ஒழுங்காற்று குழு பரிந்துரை செய்துள்ளதாக தகவல் வெளியாகியுள்ளது.
விவசாயிகளுக்கு துரோகம் செய்யும் ஸ்டாலின்? – பி.ஆர்.பாண்டியன் காட்டம்
காவிரி மேலாண்மை ஆணையத்தின் கூட்டம் நாளை நடைபெறவுள்ள நிலையில், ஒழுங்காற்று குழுவின் பரிந்துரை குறித்து அதில் விவாதிக்கப்படும். அதன்பிறகே தண்ணீர் திறப்பு தொடர்பாக காவிரி ஆணையம் இறுதி முடிவெடுக்கவுள்ளது. எனினும், காவிரி மேலாண்மை ஆணையம் உத்தரவிட்டாலும் அதனை மதித்து தமிழகத்திற்கு கர்நாடகா தண்ணீர் திறக்குமா என்ற கேள்விகளும் எழுந்துள்ளது.
மேட்டூர் அணையில் தண்ணீர் திறந்துவிடப்பட்டாலும், காவிரியின் கடை மடைப் பகுதிகளுக்கு தண்ணீர் வந்து சேரவில்லை என விவசாயிகள் கவலை தெரிவித்து வருகின்றனர். சாகுபடி செய்துள்ள நெற்பயிர்களை காப்பாற்ற கூடுதல் தண்ணீர் திறந்துவிட்டால்தான் தங்களின் பிரச்னைக்கு சற்று ஆறுதல் கிடைக்கும் என்றும் கூறுகின்றனர். இந்த சூழலில் காவிரியில் இருந்து 5,000 கன அடி தண்ணீரை கர்நாடகா திறக்குமா என்பதை பொறுத்திருந்து பார்ப்போம்.