தமிழக பாஜக மூத்த நிர்வாகியான ஹெச் ராஜா, கடந்த 2018 ஆம் திண்டுக்கல் மாவட்டம் வேடச்சந்தூரில் நடைபெற்ற கூட்டத்தில் அறநிலையத்துறை அதிகாரிகள் மற்றும் அவர்களின் குடும்பத்தை சேர்ந்த பெண்கள் குறித்து அவதூறாக பேசியிருந்தார். இதுதொடர்பாக அவர் மீது 7 காவல் நிலையங்களில் வழக்குப்பதிவு செய்யப்பட்டது.
இதேபோல் பெரியார் சிலையை உடைப்பேன் என ஹெச் ராஜா டிவீட்டியது குறித்தும் அவர் மீது 3 வழக்குகள் பதிவு செய்யப்பட்டன. மேலும் திமுக எம்பி கனிமொழி குறித்தும் தரக்குறைவாக ஹெச் ராஜா கருத்து தெரிவித்திருந்தார். இதுதொடர்பாகவும் அவர் மீது வழக்கு தொடரப்பட்டிருந்தது. இதையடுத்து தன்மீதான 11 வழக்குகளை ரத்து செய்யக்கோரி ஹெச் ராஜா சென்னை உயர்நீதிமன்றத்தில் வழக்கு தொடர்ந்திருந்தார்.
இந்த வழக்கு கடந்த 24ஆம் தேதி நீதிபதி ஆனந்த் வெங்கடேஷ் முன்பு விசாரணைக்கு வந்தது. அப்போது வாதிட்ட ஹெச் ராஜா தரப்பு வழக்கறிஞர், அறநிலையத்துறை அதிகாரிகள் அளித்துள்ள புகார்கள் செவி வழி செய்திதான் என்றும் பெரியார் குறித்து ஹெச் ராஜா டிவீட்டியதற்கு ஆதாரம் இல்லை என்றும் கூறினார்.
உச்ச நீதிமன்றமா ? உச்சுக்குடி மன்றமா ? ஹச் ராஜா சர்ச்சை பேச்சு
மேலும் கனிமொழி குறித்த கருத்து அரசியல் ரீதியானது என்றும் வாதிட்டார். இதனைக் கேட்ட நீதிபதி ஆனந்த் வெங்கடேஷ், பெண்கள் குறித்து தவறாக பேசுவதை ஏற்றுக்கொள்ள முடியாது என்று கூறிய நீதிபதி, ஹெச் ராஜா இதுபோல் பலமுறை பேசியிருப்பதாக கண்டனம் தெரிவித்து வழக்கு விசாரணையை ஒத்தி வைத்தார்.
இந்நிலையில் இந்த வழக்கு இன்று மீண்டும் விசாரணைக்கு வந்தது. அப்போது ஹெச். ராஜா இது போன்று பேசுவது முதல் முறையல்ல என்ற நீதிபதி, அவர் மீதான வழக்குகளை ரத்து செய்ய முடியாது என திட்டவட்டமாக தெரிவித்தார். மேலும் வெறுப்புணர்வை தூண்டும் பேச்சுக்கள் மீது உடனடியாக வழக்குப்பதிவு செய்து விசாரிக்க வேண்டும் என உச்சநீதிமன்றம் தெரிவித்துள்ளதைக் குறிப்பிட்ட நீதிபதி ஆனந்த் வெங்கடேஷ், ஹெச். ராஜா மீதான 11 வழக்குகளை ரத்து செய்ய மறுப்பு தெரிவித்து விட்டார்.
மேலும் 11 வழக்குகளையும் ஒன்றாகச் சேர்த்து 3 மாத காலங்களில் விசாரித்து முடிக்க கீழமை நீதிமன்றங்களுக்கும் நீதிபதி ஆனந்த் வெங்கடேஷ் உத்தரவிட்டார். ஹெச் ராஜா, தமிழக பாஜக தலைவர் அண்ணாமலை மேற்கொண்டுவரும் என் மண் என் மக்கள் நடைபயணத்தில் பங்கேற்று வருகிறார் என்பது குறிப்பிடத்தக்கது.