அதிமுக பொதுக்குழு 2022ஆம் ஆண்டு ஜூலை 11ஆம் தேதி கூடியது. அப்போது ஓபிஎஸ் உள்ளிட்ட அவரது ஆதரவாளர்களை கட்சியிலிருந்து நீக்குவதாக தீர்மானங்கள் நிறைவேற்றப்பட்டன.
அதிமுக பொதுக்குழுவுக்கு எதிராக ஓபிஎஸ் மற்றும் அவரது ஆதரவாளர்கள் உயர் நீதிமன்றம், உச்ச நீதிமன்றம் ஆகியவற்றில் சட்டப் போராட்டம் நடத்தினர். பல மாதங்கள் நடைபெற்ற இந்த வழக்கு விசாரணையின் முடிவில் உச்ச நீதிமன்றம் பொதுக்குழு செல்லும் என தீர்ப்பு வழங்கியது.
அதன் பின்னர் ஓபிஎஸ் மற்றும் அவரது ஆதரவாளர்கள் பொதுக்குழு தீர்மானங்களுக்கு எதிராக வழக்கு தொடர்ந்தனர். இதற்கிடையே அதிமுக பொதுச் செயலாளர் தேர்தல் நடத்தி எடப்பாடி பழனிசாமி பொதுச் செயலாளர் நாற்காலியில் அமர்ந்து விட்டார்.
ஓபிஎஸ் வழக்கு உயர் நீதிமன்றத்தில் தள்ளுபடி – அதிமுகவினர் கொண்டாட்டம்
உயர் நீதிமன்ற தனி நீதிபதி அமர்வு பொதுக்குழு தீர்மானங்கள் செல்லும் என தீர்ப்பு வழங்கிய நிலையில் ஓபிஎஸ் தரப்பினர் மேல்முறையீடு செய்தனர். இரு நீதிபதிகள் அடங்கிய அமர்வில் மேல்முறையீட்டு வழக்கு விசாரணை நடைபெற்று வந்தது. அண்மையில் அந்த வழக்கின் தீர்ப்பு வெளியாகியது. அதிலும் பொதுக்குழு தீர்மானங்கள் செல்லும் என்று தீர்ப்பு வழங்கப்பட்டது.
ஓபிஎஸ் தரப்புக்கு அடிமேல் அடி விழுந்தாலும் சோர்ந்து போகாமல் உச்ச நீதிமன்றம் செல்வோம் என்று கூறி வருகிறது.
இந்த சூழலில் அதிமுக பொதுச் செயலாளர் எடப்பாடி பழனிசாமி தரப்பில் உச்ச நீதிமன்றத்தில் கேவியட் மனு ஒன்று தாக்கல் செய்யப்பட்டுள்ளது. அதிமுக பொதுக்குழு விவகாரம் தொடர்பாக யார் அணுகினாலும் தங்கள் தரப்பை கேட்காமல் உத்தரவு பிறப்பிக்க கூடாது என்பதை வலியுறுத்தும் விதமாக கேவியட் மனு தாக்கல் செய்யப்பட்டுள்ளது.