இந்தியாவின் பெயரை மாற்றுவதன் மூலம் இந்தியர்களின் மனதை புண்படுத்தக்கூடாது என்பதை புரிந்துகொள்ள வேண்டும் என்று கனிமொழி கூறியுள்ளார்.
இந்தியாவுக்கு பாரத் என பெயர் சூட்டத் துடிக்கிறது பாஜக அரசு. இந்திய குடியரசுத் தலைவர் அனுப்பிய கடிதத்திலேயே பாரத் என்று குறிப்பிடப்பட்டுள்ளது சர்ச்சையை ஏற்படுத்தி வருகிறது. பாரத் என்ற பெயருக்கு ஆதரவும், எதிர்ப்பும் ஒரு சேர கிளம்பி வருகிறது. நாடாளுமன்ற சிறப்பு கூட்டத் தொடரில் அது தொடர்பாக மசோதா கொண்டு வர வாய்ப்புள்ளதாகவும் கூறப்படுகிறது.
கனிமொழி சொல்வது என்ன?
இந்த விவகாரம் குறித்து திமுக துணைப் பொதுச் செயலாளர் கனிமொழி பேசியுள்ளார். சென்னையில் இன்று (செப்டம்பர் 6) செய்தியாளர்களைச் சந்தித்த அவர், “அரசியலமைப்புச் சட்டத்தில் பாரத் என்று இருப்பதாகக் கூறுகிறார்கள். இந்த இரண்டு வார்த்தைகளுமே அதில் உள்ளன. மேடைகளில் பேசுகிறவர்கள்கூட இந்த இரண்டு பெயர்களையும் பயன்படுத்துகிற சூழல்தான் இருந்து வருகிறது.
நாட்டின் பெயரை மாற்றினால் ரூ.150 லட்சம் கோடி கடன் தள்ளுபடி ஆகுமா.?
பாஜக எடுக்கும் பெயர் அரசியல்!
ஆனால், எப்போதுமே பாரதப் பிரதமர் என்பதைவிட, Prime Minister of India என்றுதான் அழைப்பிதழ்கள் கொடுக்கப்படும். அதேபோல, President of India தான். திடீரென்று, தேவையில்லாமல் புதிதாக ஒரு சர்ச்சையை ஏற்படுத்துகிற வகையில், பாரத குடியரசுத் தலைவர் என்பதும், இந்தியாவின் பெயரை பாரதம் என்று மாற்றப்போகிறோம் என்று கூறுவதற்குப் பின்னால் ஒரு அரசியல் இருக்கிறது. அதை நாம் எதிர்க்க வேண்டிய கட்டாயத்துக்கு ஆளாக்கப்படுகிறோம்” என்று கூறினார்.
சட்டங்களுக்கும் பெயர் மாற்றம்!
இந்தியா என்ற பெயரில், எதிர்க்கட்சிகள் ஒன்றிணைந்து ஒரு தளத்தில் ஒரு கூட்டணியை உருவாக்கியிருக்கும் போது, அந்தப் பெயரே ஒன்றிய அரசுக்கு அச்சத்தை ஏற்படுத்தக்கூடிய சூழலில்தான் பெயரையே மாற்றியுள்ளனர். வரலாற்றை மாற்றுவது, பெயர்களை மாற்றுவது எனத்தொடங்கி, சட்டங்களுக்குக்கூட இந்தியில் பெயர் வைக்க ஆரம்பித்துவிட்டனர்.
திட்டங்களுக்கும் பெயர் மாற்றம்!
எல்லா திட்டங்களுக்கும் புரியாத பெயர்களை வைக்கும் அவர்களுக்கு இதுபோல மாற்றுவது சாதாரண ஒன்றாக தோன்றலாம். எத்தனையோ விசயங்களில் மனதை புண்படுத்திவிட்டதாக கூறும் அவர்கள், இப்படி பெயர் மாற்றுவதன் மூலம் இந்தியர்களின் மனதை புண்படுத்தக்கூடாது என்பதை புரிந்துகொள்ள வேண்டும்” என்று பேசியுள்ளார்.