நெல்லை:
ஒருவேளை இஸ்லாத்தை வேரறுப்பேன் என்று அமைச்சர் உதயநிதி ஸ்டாலின் சொன்னால் என்ன நடக்கும் என்று தமிழக பாஜக தலைவர் அண்ணாமலை பேசியுள்ளார்.
சனதானத்தை ஒழிக்க வேண்டும் என அமைச்சர் உதயநிதி பேசியது தேசிய அளவில் சர்ச்சையாகி உள்ளது. இந்நிலையில், இதுகுறித்து நெல்லையில் நடைபெற்ற பாஜக பாதயாத்திரையில் அண்ணாமலை பேசியதாவது:
சனாதனம் சனாதனம்னு எல்லோரும் பேசுறாங்க. முதலில் சனாதனம் என்றால் என்ன என்று நாம் தெரிந்து கொள்ள வேண்டும். சனாதன தர்மம் என்றால் பார்ப்பனியம்; சனாதன தர்மம் என்றால் பிராமண ஆதிக்கம் என திமுக காரர்கள் சொல்வார்கள். சனாதனத்தின் உண்மையான அர்த்தம் அதுவல்ல. முடிவும் முதலும் இல்லாத தர்மம்தான் சனாதன தர்மம். இது 20 ஆயிரம் ஆண்டுகளாக இருக்கிறது. இன்னும் 2 லட்சம் ஆண்டுகள் ஆனாலும் இருக்கும்.
இந்து மதத்தில் மட்டும்தான் மனிதனை கடவுள் என்று சொல்கிறோம். சனாதன தர்மத்த்தில் மட்டும்தான் அது சாத்தியம். உதாரணம் நமது அய்யா உண்டு. பிறப்பில் மனிதராக இருந்தாலும் கடவுள் அவர். நம்முடைய மரத்திற்கும், செடிக்கும் பாதிப்பு ஏற்பட்டால் கூட அவற்றுக்கு வலிக்கும் என சொல்வதுதான் சனாதன தர்மம். விலங்குகளுக்கு உணர்வு இருக்கிறது. அதை கூட துன்புறுத்தக் கூடாது என சொல்வதுதான் சனாதன தர்மம்.
சனாதனத்தில் பாகுபாடு கிடையாது. சனாதனம் ஏற்றத்தாழ்வை கற்பிக்கவில்லை. மனிதர்கள்தான் ஏற்றத்தாழ்வை ஏற்படுத்தினார்கள். அதை இன்றைக்கு மனிதர்களே சரி செய்கிறார்கள். ஒரு சகஜானந்தர் சுவாமி வருகிறார். மக்கள் அனைவரும் சமம் என்கிறார். ஒரு ராமானுஜர் வருகிறார்.. அனைத்து ஜாதிகளும் சமம் என சொல்கிறார். ஆதி சங்கராச்சாரியார் வந்து சொல்கிறார்கள் அனைவரும் சமம் என்று. சனாதன தர்மத்தில் அவ்வப்போது பிரச்சினைகள் ஏற்படும் போது, அதை சரிசெய்ய அவ்வப்போது மகான்களும் சனாதன தர்மத்தில் உருவாகுகிறார்கள்.
இன்னைக்கு உதயநிதி ஸ்டாலின் சனாதன தர்மத்தை வேரறுப்பேன் என்று சொன்ன போது இந்த அண்ணாமலை பொங்கினான். அண்ணண் கிருஷ்ணசாமி அவர்கள் பொங்கினார்கள். நாளை ஒருவேளை உதயநிதி ஸ்டாலின் இஸ்லாத்தை வேரறுப்பேன் என்று சொன்னாலும் இந்த அண்ணாமலை பொங்குவான். பாஜகவினர் பொங்குவார்கள். இதுதான் நாங்கள் என அண்ணாமலை கூறினார்.