வருத்தப்படாத வாலிபர் சங்கம் 10ம் ஆண்டு கொண்டாட்டத்தில் சிவகார்த்திகேயன்
சிவகார்த்திகேயனின் திரையுலக பயணத்தில் ஒரு திருப்புமுனையை ஏற்படுத்திய படம் வருத்தப்படாத வாலிபர் சங்கம். அதுமட்டுமல்ல அந்த படத்தின் கதாநாயகியாக நடித்த ஸ்ரீ திவ்யாவுக்கு தமிழில் ஒரு நல்ல அறிமுகத்தையும் ஏற்படுத்திக் கொடுத்தது. அறிமுகம் இயக்குனர் பொன்ராம் இயக்கியிருந்த இந்த படம் கிராமத்து பின்னணியில் நூறு சதவீத காமெடிக்கு உத்தரவாதம் தரும் விதமாக உருவாகி, வெற்றியை பெற்றது. இந்த நிலையில் தற்போது இந்த படம் வெளியாகி பத்து வருடங்களை தொட்டுள்ளது.
கடந்த பத்து வருடங்களுக்கு முன்பு சரியாக இதேநாளில் இந்த படம் வெளியானதை கொண்டாடும் விதமாக இன்று சென்னையில் இந்த படம் பிரபல தியேட்டர் ஒன்றில் சிறப்பு காட்சியாக திரையிடப்பட்டது. இதில் ரசிகர்களுடன் சேர்ந்து சிவகார்த்திகேயன், ஸ்ரீதிவ்யா, சூரி, இயக்குனர் பொன்ராம் உள்ளிட்ட படக்குழுவினர் கலந்துகொண்டு படம் பார்த்து ரசித்ததுடன் ரசிகர்களுடனும் கலந்துரையாடி மகிழ்ந்தனர்.