மறைந்த மாரிமுத்து நடித்த சீரியலின் கடைசி எபிசோடு இன்று ஒளிபரப்பு?
தமிழ் சினிமாவில் இயக்குனராக, குணச்சித்திர நடிகராகவும், 'எதிர்நீச்சல்' சீரியலில் குணசேகரன் கதாபாத்திரத்தில் நடித்து பிரபலமான மாரிமுத்து கடந்த வாரம் திடீர் மாரடைப்பால் காலமானார்.
அவர் நடித்து வந்த 'எதிர் நீச்சல்' சீரியலின் கடைசி எபிசோடு இன்று(செப்., 12) ஒளிபரப்பாக உள்ளதாகத் தெரிகிறது. அதற்கான புரோமோ நேற்று வெளியானது. அதில் மாரிமுத்துவுக்கு வேறு ஒருவர் பின்னணிக் குரல் கொடுத்திருக்கிறார். அந்தக் குரல் துளி கூட பொருத்தமாக இல்லை என ரசிகர்கள் கமெண்ட் செய்துள்ளனர்.
அவரது கதாபாத்திரத்தில் நடிகர் வேல ராமமூர்த்தியை நடிக்க வைக்கப் பேச்சு வார்த்தைகள் நடந்து வருகிறது. அவர் நடிக்க சம்மதிப்பாரா இல்லையா என்பது சில நாட்களில் தெரிந்துவிடும். டிவியில் நடிகைகள்தான் அதிகம் பெயர் வாங்குவார்கள். ஆனால், ஒரு வில்லத்தனமான கதாபாத்திரத்தில் நடித்து ரசிகர்களைக் கவர்ந்தவர் மாரிமுத்து. அதனால்தான் அவரது மறைவு கடந்த வாரம் சமூக வலைத்தளங்களிலும் கடும் தாக்கத்தை ஏற்படுத்தி இருந்தது.