ஆன்லைன் மோசடிகள் நாளுக்கு நாள் அதிகரித்து வருகிறது. இந்த மோசடிகளால் அப்பாவி மக்கள் நாளுக்கு நாள் பல லட்சங்களை இழந்து வருகின்றனர்.
ஆந்திர மாநிலம் விசாகப்பட்டினத்தை சேர்ந்த ராம்கி நாயுடு(57) சமீபத்தில் பன்னாட்டு மருந்து கம்பெனியில் பணியாற்றிவிட்டு முன்கூட்டியே ஓய்வு பெற்று இருந்தார். அவர் ஓய்வு பெற்றதன் மூலம் ரூ.84 லட்சம் பணம் கிடைத்திருந்தது. அந்த பணத்தைக்கொண்டு தனது மகனை வெளிநாட்டுக்கு அனுப்பி படிக்க வைக்க முடிவு செய்திருந்தார். ஆனால் நாயுடு ஆன்லைன் மோசடி கும்பலிடம் சிக்கி தனது முழு பணத்தையும் இழந்து நிற்கிறார். இது குறித்து ராம்கி நாயுடு கூறுகையில், ”எனக்கு ஓய்வு பெற 3 ஆண்டுகள் இருந்தது. எனது மகனை வெளிநாட்டிற்கு அனுப்பி படிக்க வைக்க பணம் தேவைப்பட்டதால் பணியில் இருந்து முன்கூட்டியே ஓய்வு பெற்றேன். எனது மகனுக்கு மே 17-ம் தேதி விசா நேர்காணல் இருந்தது.
.webp.jpeg)
ஆனால் மே 14-ம் தேதி ஒரு கும்பல் என்னிடம் இருந்த 84 லட்சத்தையும் மோசடி செய்துவிட்டது. எனது வங்கி கணக்கு விபரங்களை சரிபார்த்துவிட்டு 15 நிமிடத்தில் பணத்தை திரும்ப கொடுத்துவிடுவதாக சொன்னார்கள். ஆனால் பணத்தை மோசடி செய்துவிட்டனர். எனக்கு ஓய்வு பெற்றதன் மூலம் பணம் கிடைத்து இருப்பது வங்கி அதிகாரிகளுக்கு தெரியும். அவர்களுக்கும் இந்த மோசடியில் தொடர்பு இருக்கும் என்று நினைக்கிறேன். அவர்கள்தான் எனது வங்கிக்கணக்கில் பணம் இருப்பது குறித்து தெரிவித்து இருக்கவேண்டும்.
கடந்த மாதம் மும்பை சைபர் பிரிவு துணை போலீஸ் கமிஷனர் பால்சிங் ரஜபுத் என்று கூறிக்கொண்டு ஒருவர் போன் செய்தார். போனில் பேசிய நபர் உங்களது பெயர் போதைப்பொருள் கடத்தல் மற்றும் பணமோசடியில் இணைக்கப்பட்டுள்ளது. உங்களது ஆதார் கார்டு இவ்வழக்குகளில் சேர்க்கப்பட்டு இருக்கிறது என்று தெரிவித்தார். அதே நபர் வேறு ஒருவருக்கு போன் செய்து என்னுடன் பேச கொடுத்தார். அந்த நபர் என் மீது வழக்கு பதிவு செய்வதாக மிரட்டினார். ஆனால் நான் எந்த தவறும் செய்யவில்லை என்று சொன்னேன். ஆனால் எனது வங்கிக்கணக்கில் இருக்கும் 85 லட்சத்தை தாங்கள் சொல்லும் வங்கிக்கணக்கிற்கு அனுப்பும்படி கேட்டுக்கொண்டனர். கணக்கை சரிபார்த்துவிட்டு பணத்தை திரும்ப கொடுத்துவிடுவோம் என்று சொன்னார்கள்.
அவர்கள் எங்கும் செல்லவிடாமல் இரண்டு நாட்கள் ஸ்கைப் கால் மூலம் விசாரணை நடத்தினர். என்னை வெளியில் செல்லவோ அல்லது வேறு யாரிடமும் போனில் பேசவோ அனுமதிக்கவில்லை. அருகில் உள்ள எச்.டி.எப்.சி. வங்கிக்கிளைக்கு சென்று ரானா கார்மென்ட்ஸ் என்ற பெயருக்கு 84 லட்சம் காசோலையை டெபாசிட் செய்யும் படி கேட்டுக்கொண்டனர். நானும் வேறு வழியில்லாமல் அவர்கள் சொன்னபடி வங்கியில் காசோலையை டெபாசிட் செய்தேன்”என்றார்.
மோசடிக்கும்பல் பணம் முழுவதையும் எடுத்துக்கொண்டு திரும்ப கொடுக்கவில்லை. இதையடுத்து நாயுடு இது குறித்து போலீஸில் புகார் செய்துள்ளார். போலீஸார் வழக்கு பதிவு செய்து விசாரித்து வருகின்றனர். ரானா கார்மென்ட்ஸ் கம்பெனிக்கு சென்று பார்த்தபோது அங்கு வேறு ஒரு கம்பெனி செயல்பட்டு வந்தது. ரானா கார்மென்ட்ஸ் உரிமையாளர் வங்கி கணக்கில் கே.ஒ.சியை புதுப்பிக்காமல் இருந்தார்.
அதன் உரிமையாளர் தலைமறைவாகிவிட்டார். அவரை தேடி வருகின்றனர். ரானா கார்மென்ட்ஸ் வங்கிக்கணக்கிற்கு வந்த பணம் 105 வங்கிக்கணக்கிற்கு டிரான்ஸ்பர் செய்யப்பட்டுள்ளது போலீஸாரின் விசாரணையில் தெரிய வந்துள்ளது. போலீஸார் எச்.டி.எப்.சி வங்கிக்கிளையில் ரெய்டு நடத்தி முக்கிய ஆவணங்களை எடுத்துச்சென்றுள்ளனர். நாயுடுவிற்கு கணக்கு இருந்த எச்.டி.எப்.சி.கிளையும் இது தொடர்பாக போலீஸில் புகார் செய்துள்ளது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/crf99e88
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/crf99e88