ICC T20 World Cup 2024 Super 8 Round Full Schedule: ஐசிசி டி20 உலகக் கோப்பை தொடர் 2024 (ICC T20 World Cup 2024) தற்போது நடைபெற்று வருகிறது. குரூப் சுற்று போட்டிகள் இன்றுடன் நிறைவடைகின்றன. அடுத்து சூப்பர் 8 சுற்றுக்கு 8 அணிகளும் தயாராகிவிட்டன. இந்த 8 அணிகளும் இரண்டு பிரிவாக பிரிக்கப்பட்டுள்ளன. இதில் ஒரு அணி ஒரு பிரிவில் இருக்கும் மற்ற 3 அணிகளுடன் தலா 1 முறை மோதும். சூப்பர் 8 சுற்று முடிவில் பிரிவின் முதலிரண்டு இடங்களை பிடிக்கும் அணிகள் அரையிறுதிச் சுற்றுக்கு தகுதிபெறும்.
குருப் பிரிவில் மொத்தம் 20 அணிகள் மோதிய நிலையில் 8 அணிகள் மட்டுமே அடுத்த சுற்றுக்கு முன்னேறி உள்ளது. 12 அணிகள் வெளியேறியிருக்கிறது. குரூப் ஏ பிரிவில் இந்தியா 7 புள்ளிகளுடனும் மற்றும் அமெரிக்கா 5 புள்ளிகளுடனும் சூப்பர் 8 சுற்றுக்கு தகுதிபெற்றிருக்கின்றன. பாகிஸ்தான், கனடா, அயர்லாந்து ஆகிய அணிகள் வெளியேறின.
மீதம் உள்ள 2 போட்டிகள்
குரூப் பி பிரிவில் ஆஸ்திரேலியா 8 புள்ளிகளுடனும், இங்கிலாந்து 5 புள்ளிகளுடனும் சூப்பர் 8 சுற்றுக்கு தகுதிபெற்றுள்ளன. ஸ்காட்லாந்து, நமீபியா, ஓமன் ஆகிய அணிகள் வெளியேறிவிட்டன. குரூப் டி பிரிவில் தென்னாப்பிரிக்கா 8 புள்ளிகளுடனும், வங்கதேசம் 6 புள்ளிகளுடனும் அடுத்த சுற்றுக்கு சென்றுள்ளன. இலங்கை, நெதர்லாந்து, நேபாளம் ஆகிய அணிகள் வெளியேறிவிட்டன.
குரூப் சி பிரிவில் மட்டும் இன்னும் இரண்டு போட்டிகள் மீதம் உள்ளன. இன்று இரவு 8 மணிக்கு நடைபெறும் போட்டியில் நியூசிலாந்து – பப்புவா நியூ கினியா அணிகளும், நாளை காலை 6 மணிக்கு ஆப்கானிஸ்தான் – மேற்கு இந்திய தீவுகள் அணிகளும் மோதுகின்றன. இருப்பினும் இந்த குரூப்பில் ஆப்கானிஸ்தான், மேற்கு இந்திய தீவுகள் அணிகள் ஏற்கெனவே 6 புள்ளிகளுடன் சூப்பர் 8 சுற்றுக்கு தகுதிபெற்றுவிட்டன. இன்று வெற்றி பெறும் அணி 8 புள்ளிகளை பெறும்.
சூப்பர் 8 பிரிவுகள்…
அந்த வகையில், சூப்பர் 8 சுற்று குரூப் 1 மற்றும் குரூப் 2 என இரு பிரிவுகளாக பிரிக்கப்பட்டுள்ளது. இந்தியா (A1), ஆஸ்திரேலியா (B2), ஆப்கானிஸ்தான் (C1), வங்கதேசம் (D2) ஆகிய நான்கு அணிகள் குரூப் 1 பிரிவிலும், அமெரிக்கா (A2), இங்கிலாந்து (B1), மேற்கு இந்திய தீவுகள் (C2), தென்னாப்பிரிக்கா (D1) ஆகிய நான்கு அணிகள் குரூப் 2 பிரிவிலும் இடம்பெற்றுள்ளன. இந்நிலையில் சூப்பர் 8 சுற்றில் எந்தெந்த அணிகள், எப்போது, எந்த மைதானங்களில் போட்டியிட உள்ளன என்பது குறித்து இதில் காணலாம்.
சூப்பர் 8 சுற்று அட்டவணை (இந்திய நேரப்படி)
ஜூன் 19: அமெரிக்கா vs தென்னாப்பிரிக்கா – சர் விவியன் ரிச்சர்ட்ஸ் ஸ்டேடியம், நார்த் சவுண்ட், ஆன்டிகுவா [இரவு 8 மணி]
ஜூன் 20: இங்கிலாந்து vs மேற்கு இந்திய தீவுகள் – டேரன் சமி தேசிய கிரிக்கெட் மைதானம், செயின்ட் லூசியா [அதிகாலை 6 மணி]
ஜூன் 20: ஆப்கானிஸ்தான் vs இந்தியா – கென்சிங்டன் ஓவல், பிரிட்ஜ்டவுன், பார்படாஸ் [இரவு 8 மணி]
ஜூன் 21: ஆஸ்திரேலியா vs வங்கதேசம் – விவியன் ரிச்சர்ட்ஸ் ஸ்டேடியம், நார்த் சவுண்ட், ஆன்டிகுவா [அதிகாலை 6 மணி]
ஜூன் 21: இங்கிலாந்து vs தென்னாப்பிரிக்கா – டேரன் சமி தேசிய கிரிக்கெட் மைதானம், செயின்ட் லூசியா [இரவு 8 மணி]
ஜூன் 22: அமெரிக்கா vs மேற்கு இந்திய தீவுகள் – கென்சிங்டன் ஓவல், பிரிட்ஜ்டவுன், பார்படாஸ் [அதிகாலை 6 மணி]
ஜூன் 22: இந்தியா vs வங்கதேசம் – விவியன் ரிச்சர்ட்ஸ் ஸ்டேடியம், நார்த் சவுண்ட், ஆன்டிகுவா [இரவு 8 மணி]
ஜூன் 23: ஆப்கானிஸ்தான் vs ஆஸ்திரேலியா – அர்னோஸ் வேல் மைதானம், கிங்ஸ்டவுன், செயின்ட் வின்சென்ட், [அதிகாலை 6 மணி]
ஜூன் 23: அமெரிக்கா vs இங்கிலாந்து – கென்சிங்டன் ஓவல், பிரிட்ஜ்டவுன், பார்படாஸ் [இரவு 8 மணி]
ஜூன் 24: மேற்கு இந்திய தீவுகள் vs தென்னாப்பிரிக்கா – விவியன் ரிச்சர்ட்ஸ் ஸ்டேடியம், நார்த் சவுண்ட், ஆன்டிகுவா [அதிகாலை 6 மணி]
ஜுன் 24: ஆஸ்திரேலியா vs இந்தியா, டேரன் சமி தேசிய கிரிக்கெட் மைதானம், செயின்ட் லூசியா [இரவு 8 மணி]
ஜூன் 25: ஆப்கானிஸ்தான் vs வங்கதேசம், அர்னோஸ் வேல் மைதானம், கிங்ஸ்டவுன், செயின்ட் வின்சென்ட், [அதிகாலை 6 மணி]