திருச்சி மாவட்டம், மண்ணச்சநல்லூர் அடுத்துள்ள சிறுகாம்பூரைச் சேர்ந்தவர் ரவிக்குமார். இவரின் மனைவி சுமதி (வயது: 42). சலவைத் தொழிலாளியான ரவிக்குமாருக்கு உடல் நிலை பாதிக்கப்பட்டது. இதனால், அவரின் மனைவி சுமதி திருச்சியில் உள்ள ஒரு ஜவுளி கடைக்கு வேலைக்குச் சென்று வந்தார். இந்நிலையில், வாழ்மால்பாளையத்தைச் சேர்ந்த மாரிமுத்து (வயது: 30) என்ற இளைஞருடன் சுமதிக்கு செல்போன் மூலமாக தொடர்பு ஏற்பட்டுள்ளது. இது நாளடைவில் திருமணம் மீறிய உறவாக மாறியது. இது சுமதியின் உறவினர்களுக்கு தெரியவரவே, அவர்கள் சுமதியைக் கண்டித்துள்ளனர்.
இதனால் சுமதி, மாரிமுத்துவிடம் திருமணம் மீறிய தொடர்பை துண்டித்துக்கொள்ளலாம் என்று கூறியுள்ளார். அதன் பின்னர், மாரிமுத்து சுமதியை பார்க்க வந்தபோது, அவர் பேசவில்லை. மேலும், மாரிமுத்துவின் செல்போன் அழைப்பையும் அவர் ஏற்கவில்லை. தன்னுடன் திருமணம் மீறிய உறவில் இருந்த பெண் திடீரென தொடர்பை துண்டித்துக்கொண்டதை மாரிமுத்துவால் ஏற்றுக்கொள்ள முடியவில்லை. சுமதியிடம் நேரில் வந்து அழைத்த போதும், சுமதி செல்ல மறுத்து விட்டதாக கூறப்படுகிறது. இதனால் ஆத்திரமடைந்த மாரிமுத்து, சிறுகாம்பூர் பேருந்து நிலையத்தில் கத்தியுடன் காத்திருந்தார். அப்போது, வேலைக்குச் செல்வதற்காக அங்கு வந்த சுமதியை கத்தியால் சரமாரியாக குத்தியுள்ளார்.
இதில் கதறித் துடித்த சுமதி தப்பித்து ஓடி உள்ளார். ஆனால், அவரை விடாமல் தொடர்ந்து விரட்டிச் சென்று ஆத்திரம் தீரும் வரை மாரிமுத்து கத்தியால் குத்தியுள்ளார். இதில் ரத்த வெள்ளத்தில் சுமதி அங்கேயே சரிந்து விழுந்தார். இதனைக் கண்ட பொதுமக்கள் மாரிமுத்துவை சுற்றி வளைத்துப் பிடித்தனர். அவரிடம் இருந்த கத்தியைப் பிடுங்கி உள்ளனர். மேலும், அவருக்கு தர்ம அடி விழுந்துள்ளது. இது குறித்து, வாத்தலை காவல் நிலைய போலீஸாருக்கும் தகவல் அளிக்கப்பட்டது.
அங்கு வந்த போலீஸார் ரத்த வெள்ளத்தில் கிடந்த சுமதியை பொதுமக்கள் உதவியுடன் மீட்டு, அருகில் உள்ள மருத்துவமனைக்கு கொண்டு சென்றனர். ஆனால், அங்கு பரிசோதித்த மருத்துவர்கள் அவர் கொண்டு வரும் வழியில் இறந்துவிட்டதாக தெரிவித்தனர். இதனை தொடர்ந்து, அவரின் உடல் திருச்சி அரசு மருத்துவமனைக்கு உடற்கூராய்வு மேற்கொள்வதற்காக கொண்டு செல்லப்பட்டது. பொதுமக்களால் தாக்கப்பட்ட மாரிமுத்துவை வாத்தலை காவல் நிலைய போலீஸார் கைதுசெய்து விசாரணை நடத்தி வருகின்றனர். சிறுகாம்பூர் பேருந்து நிலையத்தில் பட்டப்பகலில் பெண் ஒருவர் ஓட ஓட விரட்டி குத்திக் கொலைசெய்யப்பட்ட சம்பவம், அந்தத் பகுதியில் பரபரப்பை ஏற்படுத்தியுள்ளது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/2b963ppb
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb