அயர்லாந்தை வீழ்த்தி இலங்கை மகளிர் அணி வெற்றி..

இலங்கை மகளிர் அணிக்கும் அயர்லாந்து மகளிர் அணிக்கும் இடையில் நேற்று (11) இடம்பெற்ற முதலாவது இருபதுக்கு 20 போட்டியில் இலங்கை அணி 7 விக்கெட்டுக்களால் வெற்றியீட்டியது.

போட்டியின் நாணய சுழற்சியில் வெற்றிபெற்ற இலங்கை மகளிர் அணி அயர்லாந்து மகளிர் அணியை முதலில் துடுப்பெடுத்தாட அழைத்ததுடன் அவர்கள் தமது 20 ஓவர்களில் 6 விக்கெட்டுக்களை இழந்து 145 ஓட்டங்களைப் பெற்றனர்.

பந்துவீச்சில் இலங்கை அணி சார்பாக இனோஷி பிரியதர்ஷினி 2 விக்கெட்டுகளையும், உதேஷிகா பிரபோதனி மற்றும் சுகந்திகா குமாரி தலா ஒரு விக்கெட் வீதம் கைப்பற்றினர்.

பதிலுக்கு துடுப்பெடுத்தாடிய இலங்கை மகளிர் அணி 16 ஓவர்கள் 4 பந்துகளில் 3 விக்கெட்டுகளை இழந்து 149 ஓட்டங்களைப் பெற்று இலகுவாக வெற்றி பெற்றது.

இலங்கை அணி சார்பாக சிறப்பாக விளையாடிய ஹர்ஷிதா சமரவிக்ரம ஆட்டமிழக்காமல் 86 ஓட்டங்களையும், அவருடன் இணைந்து விளையாடிய விஷ்மி குணரத்ன 30 ஓட்டங்களையும் பெற்றனர்.

இதன்படி, 2 போட்டிகள் கொண்ட டி20 தொடரில் இலங்கை மகளிர் அணி 1 – 0 என்ற நிலையில் முன்னிலை பெற்றது.