சூர்யா நடிப்பில் `சிறுத்தை’ சிவா இயக்கத்தில் உருவாகியுள்ள திரைப்படம் `கங்குவா’.
மிகப் பிரமாண்டமான பொருட்செலவில் வரலாற்றுப் புனைவாக உருவாகியுள்ள ‘கங்குவா’ திரைப்படம் தமிழ், தெலுங்கு, இந்தி உட்பட 10 மொழிகளில் வெளியாக இருக்கிறது. இந்தப் படத்தில் நடிகர் சூர்யாவுடன் இணைந்து திஷா பதானி, பாபி தியோல் ஆகியோர் முக்கிய கதாபாத்திரங்களில் நடித்திருக்கின்றனர். வரலாற்றுப் பின்னணியுடன் நிகழ்கால சம்பவங்களை இணைத்து வித்தியாசமான படைப்பை இயக்குநர் சிவா உருவாக்கியிருக்கிறார்.
இந்தப் படத்தை ஞானவேல் ராஜாவின் ஸ்டூடியோ கிரீன் நிறுவனம் தயாரித்திருக்கிறது. ரசிகர்கள் மத்தியில் மிகுந்த எதிர்பார்ப்பை ஏற்படுத்தி இருக்கும் இந்தப் படம் வரும் அக்டோபர் 10-ம் தேதி திரையரங்குகளில் வெளியாக இருக்கிறது. இந்நிலையில் இயக்குநர் சிவாவின் பிறந்தநாளான இன்று டிரெய்லர் வெளியாகும் என்று அறிவிக்கப்பட்டிருந்தது.
அந்த வகையில் ரசிகர்கள் எதிர்பார்த்துக் காத்திருந்த ‘கங்குவா’ படத்தின் டிரெய்லரை படக் குழுவினர் தற்போது வெளியிட்டிருக்கின்றனர். டிரெய்லரில் பீரியட் காலத்தில் நடக்கும் சண்டைக் காட்சிகளும், சாகச காட்சிகளும் இடம்பெற்றிருக்கின்றன. பழங்கால மனிதர்கள், அவர்களின் தோற்றம் ஆகியவற்றை நேர்த்தியான முறையில் வடிவமைத்திருக்கின்றனர்.
தேவி ஸ்ரீபிரசாத்தின் பின்னணி இசையும் மிரட்டுகிறது. பிரமாண்ட பொருட்செலவில் உருவாகி மேக்கிங்கிலும் கவனத்தைப் பெறுகிறது. டிரெய்லர் வெளியானதைத் தொடர்ந்து படத்தின் மீதான எதிர்பார்ப்பு மேலும் அதிகரித்திருக்கிறது.
அதே சமயம் டிரெய்லரின் கடைசி ஷாட்டில் ஒருவர் மண்டை ஓடுகள் அடங்கிய மாலையை வீசியபடி குதிரையில் வருவது போன்று காட்சிப்படுத்தப்பட்டுள்ளது. அது யார் என்று காட்டப்படவில்லை என்றாலும் அது சூர்யாவின் சகோதரரும் நடிகருமான கார்த்தியாக இருக்கலாம் என்று நெட்டிசன்கள் கமென்ட் செய்து வருகின்றனர்.
