மேற்கு வங்காளத்தில் பயிற்சி பெண் டாக்டர் கொலை.. நாடு முழுவதும் போராட்டம்.. லைவ் அப்டேட்ஸ்

பயிற்சி பெண் மருத்துவர் பாலியல் வன்கொடுமை செய்யப்பட்டு கொலை செய்யப்பட்டதை கண்டித்தும், குற்றவாளிகள் மீது கடுமையான நடவடிக்கை எடுக்க வலியுறுத்தியும் மேற்கு வங்காள பா.ஜ.க. தலைவர் சுகந்த மஜூம்தார் தனது ஆதரவாளர்களுடன் கொல்கத்தாவில் ஆர்ப்பாட்டம் நடத்தினார்.

மருத்துவமனை மீதான வன்முறை தாக்குதல் தொடர்பாக 25 பேர் கைது செய்யப்பட்டிருப்பதாக கொல்கத்தா காவல்துறை தெரிவித்துள்ளது. சமூக வலைத்தளம் வாயிலாக மேலும் 4 பேர் அடையாளம் காணப்பட்டுள்ளதாகவும், அவர்களை தேடி வருவதாகவும் தெரிவித்துள்ளது.

மம்தா பானர்ஜி தலைமையில் பேரணி

பாலியல் பலாத்காரம் செய்து கொல்லப்பட்ட பயிற்சி பெண் டாக்டருக்கு நீதி கேட்டும், குற்றவாளிக்கு மரண தண்டனை வழங்க வலியுறுத்தியும் கொல்கத்தாவில் முதல்-மந்திரி மம்தா பானர்ஜி தலைமையில் பேரணி தொடங்கியது. இதில் ஏராளமானோர் பங்கேற்று, பதாகைகளை ஏந்தி வருகின்றனர்.

பயிற்சி பெண் டாக்டர் கொலை செய்யப்பட்ட மருத்துவக் கல்லூரி மருத்துவமனைக்கு சி.பி.ஐ. அதிகாரிகள் வந்தனர். வன்முறைக் கும்பலால் சேதப்படுத்தப்பட்ட அவசர சிகிச்சைப் பிரிவு வழியாக மருத்துவமனைக்குள் நுழைந்த அவர்கள், விசாரணையை தொடங்கினர்.

தலைநகரில் டாக்டர்கள் போராட்டம்

டெல்லி முழுவதும் உள்ள உறைவிட டாக்டர்கள் சங்கங்களைச் சேர்ந்த டாக்டர்கள் டெல்லி நிர்மாண் பவனில் கூட்டுப் போராட்டம் நடத்தினர்.

கொல்கத்தா ஷியாம்பஜார் மெட்ரோ ரெயில் நிலையம் அருகே போராட்டத்தில் ஈடுபட்ட பா.ஜ.க.வினரை போலீசார் கைது செய்தனர்.

சண்டிகரில் உள்ள பிஜிமர் மருத்துவமனையின் ஜூனியர் டாக்டர்கள் மற்றும் மாணவர்கள் பேரணி நடத்தினர்.

ஆந்திராவின் மங்களகிரியில் உள்ள எய்ம்ஸ் மருத்துவமனையில் ஜூனியர் டாக்டர்கள் மற்றும் மருத்துவ மாணவர்கள் போராட்டம் நடத்தினர். மேலும் வீதி நாடகமும் நடத்தினர்.