வெங்கட் பிரபு இயக்கத்தில் விஜய் நடித்திருக்கும் `தி கிரேட்டஸ்ட் ஆஃப் ஆல் டைம்’ (The G.O.A.T) திரைப்படம் அடுத்த மாதம் 5-ம் தேதி வெளியாகிறது.
பிரஷாந்த், பிரபு தேவா, சினேகா, மீனாட்சி செளத்ரி ஆகியோர் முக்கியக் கதாபாத்திரங்களில் நடித்திருக்கிறார்கள். யுவன் சங்கர் ராஜா இசை அமைத்திருக்கிறார். இத்திரைப்படம் எபிக், ஐமேக்ஸ் ஆகிய ஸ்கிரீன்களிலும் வெளியாகும் என்பதை ஸ்பெஷல் போஸ்டர்களோடு படக்குழு அறிவித்திருந்தது. இந்நிலையில் இப்படத்தின் டிரெய்லருக்காக ரசிகர்கள் காத்திருந்தனர்.
ஆகஸ்ட் 17-ம் தேதி மாலை 5 மணிக்குப் படத்தின் டிரெய்லர் ரிலீஸ் ஆகவுள்ளது எனப் படக்குழு தரப்பிலிருந்து ஏற்கனவே அறிவிப்புகள் வெளியான இருந்தது. அந்த வகையில் தற்போது ‘The G.O.A.T’ படத்தின் டிரெய்லரைப் படக்குழுவினர் தற்போது வெளியிட்டிருக்கின்றனர்.
டிரெய்லரின் ஆரம்பத்தில் ‘அண்ணா வர்றார் வழிவிடு’ என்ற பன்ச் இடம்பெற்றிருக்கிறது. மாஸான ஆக்ஷன் காட்சிகளும் இடம்பெற்றிருக்கின்றன. அதே சமயம் தந்தை – மகன், கணவன் – மனைவி தொடர்பான சென்டிமென்ட் காட்சிகளும் இடம்பெற்றிருக்கின்றன. ஹைலைட்டாக இதில் இரண்டு வேடங்களில் நடித்திருக்கிறார் விஜய். இளமையான விஜய்க்கு டீ-ஏஜிங் தொழில்நுட்பம் பயன்படுத்தப்பட்டிருக்கிறது. அதில் சில காட்சிகள் சற்று செயற்கையாக இருப்பதாக கலவையான விமர்சனங்கள் வந்துள்ளன.
பெரிய நடிகர் பட்டாளமே இப்படத்தில் நடித்திருக்கிறார்கள். குறிப்பாக மோகன் வில்லனாக கம்பேக் கொடுத்திருக்கிறார். மொத்தம் 2 நிமிடம் 52 விநாடிகள் இருக்கும் இந்த டிரெய்லர் தற்போது ரசிகர்கள் மத்தியில் வைரலாகி வருகிறது. படத்தின் மீதிருந்த எதிர்ப்பார்ப்பை இந்த டிரெய்லர் மூலம் எகிறச் செய்திருக்கிறார் இயக்குநர் வெங்கட் பிரபு.