‘கத்துக்குட்டி’, ‘உடன்பிறப்பே’ உள்ளிட்ட படங்களை இயக்கிய இரா. சரவணன் இயக்கத்தில், சசிகுமார் நடிப்பில் வெளியாகவுள்ள திரைப்படம் ‘நந்தன்’.
ஹீரோயினாக ஸ்ருதி பெரியசாமி நடித்திருக்கிறார். முக்கியமான கதாபாத்திரத்தில் சமுத்திரக்கனியும் நடித்திருக்கிறார். ஜிப்ரான் இப்படத்திற்கு இசையமைத்திருக்கிறார். செப்டம்பர் 20ஆம் தேதி இப்படம் வெளியாக இருக்கும் நிலையில் இப்படத்தின் இசை வெளியீட்டு விழா இன்று நடைபெற்றது. இதில் சசிகுமார், இரா.சரவணன், ஸ்ருதி பெரியசாமி, ஜிப்ரான் போன்ற படக்குழுவினரும், சீமான், ஹெச். வினோத் உள்ளிட்ட சிலரும் கலந்துகொண்டுள்ளனர்.
நிகழ்ச்சியில் பேசிய சசிகுமார், “என்னுடைய படத்தில் பயன்படுத்தப்பட்ட ஒரு டயலாக்கான ‘உங்க நேர்மை எனக்கு ரொம்ப பிடிச்சிருக்கு’ என்ற டயலாக் இயக்குநர் சரவணனுக்குத்தான் பொருந்தும். மேலும் சரவணனின் மனைவி பள்ளி ஆசிரியையாக இருந்தபோதிலும் இந்தப் படத்தின் சூட்டிங்கின்போது அவர் பாத்திரம் கழுவியதை எல்லாம் நான் பார்த்திருக்கிறேன். எங்களைவிட அவர்தான் அவ்வளவு கஷ்டப்பட்டிருக்கிறார்.
நான் இந்தப் படத்தில் ட்ரெயின் ஏற்ற சென்றவன் போலத்தான் நான்கு நாட்கள் சூட்டிங்கிற்காக கமிட் செய்திருந்தார்கள். வழியனுப்ப வந்த என்னை இயக்குநர் ட்ரெயினில் ஏற்றி விட்டார். அந்தப் படத்தில் வேறொருவர் நடிக்க வேண்டி இருந்தது. ஆனால் அதில் நான் நடிக்க வேண்டியதாகி விட்டது.
இந்தப் படத்தை நல்லவேளை நான் தவறவிடவில்லை. நந்தன் படத்தை நான் தயாரிக்க நினைத்தேன். ஆனால் அதற்கான வாய்ப்பு தனக்கு கிடைக்கவில்லை. இந்தப் படத்தில்தான் இஷ்டப்பட்டுதான் கஷ்டப்பட்டேன். இந்தப் படத்தில் சரவணனின் எழுத்து மிகப்பெரிய பாராட்டுக்களைப் பெறும். இது படம் அல்ல ஒரு பதிவு.” என்று பேசியிருக்கிறார்.