நடிகர் விஜய்யின் கடைசி திரைப்படம் எனக் கூறப்படும் `தளபதி 69′ திரைப்படம் குறித்தான அறிவிப்பு இன்று வெளியாகியிருக்கிறது. விஜய்யின் கடைசி படமான இதை வலிமை, துணிவு ஆகிய படங்களை இயக்கிய அ.வினோத் இயக்குகிறார். இப்படத்தை கன்னட திரையுலகின் தயாரிப்பு நிறுவனமான கே.வி.என் புரொடக்ஷன்ஸ் நிறுவனம் தயாரிக்கிறது.
கன்னட திரையுலகில் இயங்கி வரும் இந்த தயாரிப்பு நிறுவனத்தை வெங்கட் கே. நாராயணா என்பவரும் அவரின் மனைவியான நிஷா வெங்கட்டும் இணைந்து தொடங்கியிருக்கிறார்கள். இந்த வெங்கட் நாராயணா தயாரிப்பாளர் மட்டுமல்ல ப்ரஸ்டீஜ் குரூப்ஸின் தலைமை நிர்வாக அதிகாரிகளில் ஒருவராகவும் இருக்கிறார். இந்த நிறுவனத்தில் பணியில் இருக்கும்போதே ‘கே.வி.என்’ பவுண்டேஷன் என்ற அறக்கட்டளையை தொடங்கி பலருக்கு உதவிகளையும் செய்து வந்திருக்கிறார்.
கொரோனா காலகட்டத்தில் இந்த அறக்கட்டளையின் மூலம் பெங்களூரு, மும்பை, ஹைதராபாத் நகரங்களில் வசிக்கும் 1 லட்சம் நபருக்கு தினமும் உணவுகளை வழங்கியிருக்கிறார். அப்போது இச்செய்தி பேசுபொருளானது. இப்படியான பணிகளை செய்து வந்தவர், சொந்தமாக தயாரிப்பு நிறுவனம் ஒன்றையும் தொடங்கி கடந்த 2021-ம் ஆண்டு முதல் திரைப்பட தயாரிப்பு பணிகளிலும் சுறுசுறுப்பாக ஈடுபட்டு வருகிறார். இந்த தயாரிப்பு நிறுவனம் படங்களை தயாரிப்பது மட்டுமல்ல, மற்ற திரைப்படங்களுக்கு ஃபண்டிங்கும் செய்து வருகிறது. மேலும், பிற ‘வுட்’ களில் வெளியாகும் படங்களையும் வாங்கி திரையரங்குகளுக்கு விநியோகமும் செய்கிறார்கள்.
கன்னட நடிகர் கனேஷ் நடிப்பில் கடந்த 2021-ம் ஆண்டு வெளியான ‘சகத்’ என்ற திரைப்படம்தான் இந்த நிறுவனம் தயாரித்த முதல் திரைப்படம். அதன் பிறகு 2022-ல் கன்னட நடிகர் தன்வீர் கெளடா, நடிகை ஶ்ரீ லீலா ஆகியோர் நடிப்பில் வெளியான ‘பை 2 லவ்’தான் இந்த நிறுவனத்தின் இரண்டாவது திரைப்படம். இது போன்ற சின்ன திரைப்படங்களை தயாரித்து வந்த இந்த நிறுவனம் மூன்றாவது திரைப்படத்தையே பெரிய நட்சத்திரப் பட்டாளங்களை வைத்து எடுத்தது. துருவ் சார்ஜா, சஞ்சய் தத், ஷில்பா ஷெட்டி ஆகியோர் நடிப்பில் உருவான ‘கே.டி.டெவில்’ திரைப்படம்தான் இந்த நிறுவனத்தின் மூன்றாவது திரைப்படம்.
அடுத்ததாக இயக்குநர் கீது மோகன் தாஸ் இயக்கத்தில் கன்னட நடிகர் யஷ் நடிப்பில் உருவாகி வரும் ‘டாக்சிக்’ திரைப்படம்தான் இதன் நான்காவது படம். ஐந்தாவது திரைப்படம்தான் அ.வினோத் இயக்கும் விஜய்யின் 69-வது திரைப்படம். ஒரே சமயத்தில் தமிழ் மற்றும் கன்னடத்தின் உச்ச நட்சத்திரங்களின் படங்களை தயாரிக்கிறது இந்த நிறுவனம். இதுமட்டுமல்ல விக்ராந்த் ரோனா, சப்த சாகரடச்சல்லோ, 777 சார்லி, மார்டின் போன்ற திரைப்படங்களுக்கு ஃபண்டிங்கும் செய்திருக்கிறது. இதை தாண்டி கல்கி, அனிமல், சீதா ராமம், ஆர்.ஆர்.ஆர் போன்ற படங்களை கன்னட திரையரங்குகளுக்கு விநியோகமும் செய்திருக்கிறது.
சினிமா விகடனின் பிரத்யேக Whatsapp க்ரூப்
https://chat.whatsapp.com/E0QlpeNbGHnF9W5rFKCVSU
சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள…
உங்கள் வாட்ஸ் அப் மூலமே இணைந்திருங்கள் சினிமா விகடனுடன்…