சிவகார்த்திகேயன், சாய் பல்லவி நடிப்பில், ராஜ்குமார் இயக்கத்தில், ராஜ் கமல் இன்டர்நேஷனல் நிறுவனம் தயாரிப்பில் வெளியான திரைப்படம் ‘அமரன்’.
தீபாவளி பண்டிகையை முன்னிட்டு வெளியான இந்தத் திரைப்படம் நல்ல வரவேற்பைப் பெற்றிருக்கிறது. திரைப்பிரபலங்கள் பலரும் இப்படத்தைப் பாராட்டி இருந்தனர். இந்நிலையில் அமரன் படம் குறித்து சிவகார்த்திகேயன் பகிர்ந்திருக்கும் நேர்காணல் ஒன்று வெளியாகி இருக்கிறது. அந்த நேர்காணலில் சிவகார்த்திகேயன் நிறைய விஷயங்களைப் பேசியிருக்கிறார். அந்தவகையில் அஜித் குறித்து கேள்வி எழுப்பப்பட்டிருக்கிறது.
அதற்கு பதிலளித்த சிவகார்த்திகேயன், ” அஜித் சாரிடம் இருந்து நிறைய வாழ்க்கைப் பாடங்களைக் கற்றுக்கொள்ளலாம். அவரிடம் இருந்து கிடைக்கக்கூடிய வாழ்க்கைப் பாடங்கள் வேறு யாரிடமும் கிடைக்காது. வாழ்க்கைக்கு தேவையான நிறைய விஷயங்களை எனக்கு சொல்லி இருக்கிறார். குறிப்பாக எல்லாவற்றையும் மிகத் தெளிவாக சொல்வார். அது உங்களுக்கு ஒரு மிகப்பெரிய தன்னம்பிக்கையைக் கொடுக்கும்” என்றார்.
இதனைத்தொடர்ந்து ‘Welcome To The Big League’ என்று அஜித் சொன்னது குறித்த கேள்விக்கு பதிலளித்த சிவகார்த்திகேயன், “அவர் ‘Welcome To The Big League’ சிவா என்று சொன்ன சமயத்தில் என் படம் எதுவும் ஓடவில்லை. என் படம் தோல்வியைச் சந்தித்து இருந்தது. ஆனால் அன்றைக்கு அவர் சொன்னது எனக்கு ஒரு தன்னபிக்கையைக் கொடுத்தது. இந்த ஒரு படத்தின் தோல்வி உன்னை எதுவும் பண்ணிடாது என்று என்னை நானே தேற்றிக்கொண்டேன்.
இவ்வளவு காலம் சினிமாவில் இருக்கும் அவர் இப்படி சொன்னது எனக்கு ஒரு நம்பிக்கையைக் கொடுத்தது. இதுமாதிரி நிறைய விஷயங்களை எனக்குச் சொல்லி இருக்கிறார். சரியான நேரத்தில் அதனை நான் உங்களுக்கு சொல்கிறேன். அவருடனான சந்திப்பு எனக்கு ஒரு தன்னபிக்கை கொடுக்கும் சந்திப்பாகத்தான் இருக்கும்” என்று நெகிழ்வாகப் பேசியிருக்கிறார்.
நீங்கள் விரும்பி படித்த தொடர்கள், இப்போது ஆடியோ வடிவில்… புத்தம் புதிய விகடன் ப்ளே… உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்…