கடந்த சில நாட்களாக சிவகார்த்திகேயனின் 25வது படம் குறித்த செய்திகள் குறித்துத்தான் ஏகத்துக்கும் தகவல்கள் பரவி வருகின்றன. சுதா கொங்குரா இயக்கும் அந்த படத்தில் ஜெயம்ரவி, அதர்வா என பலரும் நடிக்கின்றனர். டெஸ்ட் ஷூட் கூட, நடந்து வருகிறது என்பது போன்ற தகவல்கள் உலா வருகின்றன.
சமீபத்தில் வெற்றி பெற்ற ‘அமரன்’ படத்தை அடுத்து, சிவா நடிப்பில் அடுத்து வெளிவரும் படமாக ஏ.ஆர்.முருகதாஸ் இயக்கி வரும் படம் இருக்கின்றது. இது சிவாவின் 23வது படமாகும். இதில் கன்னடத்தின் ‘சப்த சாகரடாச்சே எல்லோ’, தமிழில் விஜய்சேதுபதியின் ‘ஏற்’ ஆகிய படங்களின் நாயகி ருக்மிணி வசந்த் ஹீரோயின். பிஜூ மேனன், டான்ஸிங் ரோஸ் சபீர், விக்ராந்த், வித்யுத் ஜம்வால் எனப் பலரும் நடித்து வருகின்றனர். ‘அமரன்’ படத்திற்காக முறுக்கேறிய உடம்பை ஏற்றி வந்த சிவா, அதன் தொடர்ச்சியாக முருகதாஸின் படத்திலும் ஆக்ஷனுக்கான தோற்றத்தில் உள்ளார்.
மலையாளத்தில் அதிரடி ஆக்ஷன் படங்களுக்கு ஒளிப்பதிவு செய்த சுதீப் இளமன், இந்தப் படத்திற்கு ஒளிப்பதிவு செய்து வருகிறார். அனிருத் இசையமைக்கிறார். சென்னை, பாண்டிச்சேரி படப்பிடிப்பைத் தொடர்ந்து இப்போது சென்னையில் படப்பிடிப்பு நடந்து வருகிறது. சமீபத்தில் தாம்பரத்தை அடுத்து கூட, இதன் படப்பிடிப்பு நடந்தது நினைவிருக்கலாம். இப்படியான ஒரு சூழலில் தான் சிவாவின் 25வது படம் குறித்த செய்திகள் தாறுமாறான அப்டேட்களாக தெறிக்கின்றன. இது குறித்து கோடம்பாக்கத்தில் விசாரித்ததில் கிடைத்தவை இனி..
”ஏ.ஆர்.முருகதாஸ் இயக்கத்தில் சிவா நடித்து வரும் ‘எஸ்.கே.23வது படப்பிடிப்பு விரைவில் நிறைவடைகிறது. இதனை அடுத்து வரும் புத்தாண்டில் படத்தின் டைட்டில் வெளியாகிறது. இப்படம் ஏப்ரலுக்குத் திட்டமிட்டு வருகின்றனர். இந்த படத்தை முடித்துவிட்டே, SK 24-வது படத்திற்குச் செல்கிறார். ‘டான்’ சிபிச்சக்கரவர்த்தி இயக்கும் இப்படத்தின் ப்ரீ புரொடக்ஷன் வேலைகள் முடிவடையும் கட்டத்தில் உள்ளன. இதனையடுத்து, நடிகர்கள் தேர்வு நடைபெற உள்ளது.
இந்தப் படம் அனேகமாக ஜனவரிக்குப் பிறகு தொடங்கும் என எதிர்பார்க்கப்படுகிறது. இதனை அடுத்தே, சுதா கொங்கரா இயக்கும் 25வது படம் தொடங்கும். இந்தப் படத்தில் ஜெயம் ரவி, ஶ்ரீலீலா, அதர்வா ஆகியோர் நடிக்கின்றனர் எனத் தகவல்கள் வெளியாகி வருகின்றன. இதில் உறுதியான ஒரு தகவல், ஜி.வி.பிரகாஷ் இசையமைக்கிறார். சிபிசக்கரவர்த்தி படப்பிடிப்பு முடிந்த பிறகே, சுதா கொங்கராவின் பட அறிவிப்பு வெளிவரும்.
ஜெயம் ரவி தரப்பில் விசாரித்ததில் இன்னமும் உறுதி செய்யவில்லை என்கின்றனர். ரவி இப்போது ஹீரோவாக அரை டஜன் படங்கள் கைவசம் வைத்துள்ளார். இந்திப் பட வாய்ப்புகள் வந்திருக்கின்றன. எனவே அடுத்தாண்டு தான் இதுகுறித்த அதிகாரப்பூர்வ தகவல் தெரிய வரும் என்கின்றனர். வரும் பிப்ரவரியில் சிவாவின் பிறந்த நாளன்று 24வது படத்தின் ஃபர்ஸ்ட் லுக் போஸ்டரோடு, சுதா கொங்கராவின் படம் குறித்த அறிவிப்பும் வெளியாகலாம். அதுவரை வெளியாகும் தகவல்கள் உறுதியானதல்ல” என்கிறார்கள்.