ரூர்கேலா,
ஐ.பி.எல். கிரிக்கெட் பாணியில் ஆக்கி இந்தியா சார்பில் ஆக்கி இந்தியா லீக் (எச்.ஐ.எல்.) போட்டி கடந்த 2013-ம் ஆண்டு தொடங்கப்பட்டது. ஆனால் 2017-ம் ஆண்டுடன் நின்று போனது. இந்த நிலையில் 7 ஆண்டுகளுக்கு பிறகு மறுபடியும் இந்த போட்டி புதிய அவதாரம் எடுக்கிறது. இதன்படி 6-வது ஆக்கி இந்தியா லீக் போட்டி ஒடிசாவில் உள்ள ரூர்கேலா நகரில் இன்று (சனிக்கிழமை) தொடங்குகிறது.
அடுத்த ஆண்டு பிப்ரவரி மாதம் 1-ந் தேதி வரை நடக்கும் இந்த போட்டியில் டெல்லி எஸ்.ஜி. பைபர்ஸ், ஷராச்சி ரார் பெங்கால் டைகர்ஸ், சூர்மா ஆக்கி கிளப், வேதாந்தா கலிங்கா லான்சர்ஸ், கோனசிகா, ஐதராபாத் டூபான்ஸ், தமிழ்நாடு டிராகன்ஸ், உ.பி. ருத்ராஸ் ஆகிய 8 அணிகள் பங்கேற்கின்றன. இது 2 கட்டமாக நடத்தப்பட உள்ளன. முதல் கட்டத்தில் ஒவ்வொரு அணியும் மற்ற அணிகளுடன் தலா ஒரு முறை மோத வேண்டும். இதை தொடர்ந்து நடைபெறும் 2-வது கட்ட ஆட்டங்களில், அணிகள் இரு பிரிவாக பிரிக்கப்பட்டு தங்கள் பிரிவில் உள்ள மற்ற அணிகளுடன் பலப்பரீட்சை நடத்த வேண்டும். இதன் முடிவில் புள்ளி பட்டியலில் முதல் 4 இடங்களை பிடிக்கும் அணிகள் அரையிறுதிக்குள் நுழையும்.
அமித் ரோகிதாஸ் தலைமையிலான தமிழ்நாடு டிராகன்ஸ் அணி தனது முதல் ஆட்டத்தில் சூர்மா ஆக்கி கிளப்பை நாளை சந்திக்கிறது. தமிழ்நாடு அணியில் ஜிப் ஜான்சென், தாமஸ் சோர்ஸ்பி, டாம் கிரெய்க், பிளேக் கோவர்ஸ், மார்ட்டின் ஸ்விக்கெர் என நட்சத்திர பட்டாளமே இருக்கிறது. சூர்மா கிளப், இந்திய அணியின் கேப்டனான ஹர்மன்பிரீத் சிங் தலைமையில் களம் இறங்குகிறது. தொடக்க நாளான இன்று நடைபெறும் முதல் லீக் ஆட்டத்தில் டெல்லி எஸ்.ஜி. பைபர்ஸ் அணி, கோனசிகாவை எதிர்கொள்கிறது. இரவு 8.15 மணிக்கு தொடங்கும் இந்த ஆட்டத்தை சோனி டென் சேனல்கள் நேரடி ஒளிப்பரப்பு செய்கின்றன.