Champions Trophy 2025 Opening Ceremony Update | கிரிக்கெட் உலகக்கோப்பைக்கு அடுத்தபடியாக சர்வதேச கிரிக்கெட் கவுன்சில் (ஐசிசி) நடத்தும் மிகப்பெரிய கிரிக்கெட் திருவிழாவான சாம்பியன்ஸ் டிராபி கிரிக்கெட் போட்டிகளை இம்முறை பாகிஸ்தான் நடத்துகிறது. இதற்காக அந்த நாடு அனைத்து ஏற்பாடுகளையும் முழு வீச்சில் செய்து கொண்டிருக்கிறது. சாம்பியன்ஸ் டிராபி போட்டிகளுக்காக புதிதாக கடாஃபி சர்வதேச கிரிக்கெட் மைதானமும் கட்டப்பட்டு வருகிறது. இந்த பணிகள் முழு வீச்சில் நடந்து கொண்டிருக்கின்றன. இந்த மைதானத்தை பிப்ரவரி 7 ஆம் தேதி திறக்க பாகிஸ்தான் தேதி குறித்துள்ளது.
இதனைத் தொடர்ந்து பிப்ரவரி 16 ஆம் தேதி சாம்பியன்ஸ் டிராபி தொடக்க விழா நடத்த பாகிஸ்தான் திட்டமிட்டுள்ளது. ஐசிசியுடன் இணைந்து பாகிஸ்தான் நடத்தும் இந்த தொடக்க விழாவில் அனைத்து அணிகளின் கேப்டன்கள் மற்றும் கிரிக்கெட் போர்டுகளுக்கும் அழைப்பு விடுக்கப்பட்டுள்ளது. லாகூரில் உள்ள பழமையான கோட்டையான ஹுசூரி பாக் நகரில் இந்த தொடக்க விழா நடத்தப்படுகிறது. இதற்காக இந்திய அணியின் கேப்டன் ரோகித் சர்மா மற்றும் இந்திய கிரிக்கெட் வாரியத்துக்கு சர்வதேச கிரிக்கெட் கவுன்சில் அழைப்பு விடுத்திருக்கிறது. ஆனால் இந்திய அணியின் கேப்டன் ரோகித் சர்மா மற்றும் பிசிசிஐ நிர்வாகிகள் கலந்து கொள்வது குறித்து இதுவரை எந்த அதிகாரப்பூர்வமான தகவலும் இல்லை.
பாகிஸ்தான் கிரிக்கெட் வாரியத்தைப் பொறுத்தவரை இந்திய கிரிக்கெட் வாரியம் வைத்த பல கோரிக்கைகளை ஏற்றுக் கொண்டிருக்கிறது. இந்திய அணி பாகிஸ்தான் செல்ல மத்திய அரசு அனுமதிக்காததால் ஹைபிரிட் மாடலில் சாம்பியன்ஸ் டிராபி போட்டியை நடத்த வேண்டும் என பிசிசிஐ கோரிக்கை வைத்தது. பாகிஸ்தான் தரப்பில் இந்த கோரிக்கைக்கு கடுமையான எதிர்ப்பு தெரிவிக்கப்பட்ட நிலையில், பின்னர் அனைத்து கிரிக்கெட் வாரியங்களும் ஹைபிரிட் மாடல் போட்டிகளுக்கு ஒப்புதல் அளித்ததால் வேறு வழியின்றி இந்திய கிரிக்கெட் வாரியத்தின் கோரிக்கையை ஏற்றுக் கொண்டது. இதுதவிர இன்னும் சில கோரிக்கைகளையும் ஐசிசி வலியுறுத்தியதால் பாகிஸ்தான் கிரிக்கெட் வாரியம் ஏற்றுக் கொண்டது.
இந்த சூழலில் தான் சாம்பியன்ஸ் டிராபி தொடக்க விழா பாகிஸ்தானில் நடக்கிறது. இதில் இந்திய அணி கேப்டன் ரோகித் சர்மா மற்றும் பிசிசிஐ நிர்வாகிகள் கட்டாயம் கலந்து கொள்ள வேண்டும் என பாகிஸ்தான் எதிர்பார்க்கிறது. குறைந்தபட்சம் இந்த விழாவில் ஆவது இந்தியாவின் பங்கேற்பு இருக்க வேண்டும் என அந்நாடு கேட்டுக் கொண்டிருக்கிறது. இருப்பினும் இதுவரை இந்தியா பங்கேற்பதற்கான எந்த உத்தரவாதமும் பாகிஸ்தான் கிரிக்கெட் வாரியம் சார்பில் இதுவரை கொடுக்கப்படவில்லை. அதனால் இந்த விவகாரத்தில் மிகப்பெரிய சஸ்பென்ஸ் நீடிக்கிறது.
இதனிடையே சாம்பியன்ஸ் டிராபி தொடரின் முதல் போட்டி பிப்ரவரி 19 ஆம் தேதி நடக்கிறது. கராச்சியில் நடக்கும் இப்போட்டியில் நியூசிலாந்து மற்றும் பாகிஸ்தான் அணிகள் மோத உள்ளன. இந்திய கிரிக்கெட் அணி விளையாடும் அனைத்து போட்டிகளும் ஐக்கிய அரபு அமீரகம் மற்றும் துபாய் மைதானங்களில் நடக்க உள்ளது.