வதோதரா,
5 அணிகள் பங்கேற்றுள்ள 3-வது பெண்கள் பிரிமீயர் லீக் (டபிள்யூ.பி.எல்.) தொடர் குஜராத் மாநிலம் வதோதராவில் நடந்து வருகிறது. இதில் இன்று நடைபெற்ற 4-வது லீக் ஆட்டத்தில் நடப்பு சாம்பியன் ராயல் சேலஞ்சர்ஸ் பெங்களூரு – டெல்லி கேப்பிடல்ஸ் அணிகள் விளையாடின.
இதில் டாஸ் வென்ற பெங்களூரு அணியின் கேப்டன் மந்தனா பந்துவீச்சை தேர்வு செய்தார். அதன்படி முதலில் பேட்டிங் செய்த டெல்லி அணிக்கு தொடக்க வீராங்கனைகளான மெக் லானிங் 17 ரன்களிலும், ஷபாலி வர்மா ரன் எதுவுமின்றியும் ஆட்டமிழந்து ஏமாற்றம் அளித்தனர். பின்னர் களமிறங்கிய ஜெமிமா ரோட்ரிக்ஸ் சிறிது நிலைத்து விளையாட, மறுமுனையில் விக்கெட்டுகள் மளமளவென சரிந்தன. அவரும் 34 ரன்களில் ஆட்டமிழந்தார்.
இறுதி கட்டத்தில் சாரா பிரைஸ் (23 ரன்கள்), ஷிகா பாண்டே (14 ரன்கள்) ஆகியோரின் பங்களிப்பினால் டெல்லி அணி கவுரமான நிலையை எட்டியது. முடிவில் 19.3 ஓவர்கள் விளையாடிய டெல்லி கேப்பிடல்ஸ் 141 ரன்களில் ஆல் அவுட் ஆனது. சிறப்பாக பந்து வீசிய பெங்களூரு தரப்பில் ரேணுகா தாகூர் சிங் மற்றும் ஜார்ஜியா வாரிஹாம் ஆகியோர் தலா 3 விக்கெட்டுகளும், கிம் கார்த் மற்றும் எக்தா பிஸ்த் ஆகியோர் தலா 2 விக்கெட்டுகளும் வீழ்த்தி அசத்தினர்.
இதனையடுத்து 142 ரன்கள் அடித்தால் வெற்றி என்ற இலக்குடன் பெங்களூரு அணியின் சார்பில் கேப்டன் மந்தனா மற்றும் யாட் ஹாட்ஜ் ஆகியோர் முதலாவதாக களமிறங்கினர். இந்த ஜோடி தொடக்கம் முதலே அதிரடியாக ரன்கள் குவிக்கத் தொடங்கியது. இந்த ஜோடியில் டெல்லி அணியினரின் பந்துவீச்சை துவம்சம் செய்த மந்தனா 27 பந்துகளில் தனது அரை சதத்தை பதிவு செய்து அசத்தினார். மறுமுனையில் சீரான வேகத்தில் ரன்கள் சேர்த்துக் கொண்டிருந்த ஹாட்ஜ் 42 ரன்களில் கேட்ச் ஆகி வெளியேறினார். அடுத்ததாக மந்தனாவுடன், பெர்ரி ஜோடி சேர்ந்தார். தொடர்ந்து ரன்கள் குவிப்பில் ஈடுபட்ட மந்தனா அணியை வெற்றிப்பாதைக்கு அழைத்துச் சென்றார். அணியின் வெற்றிக்கு 9 ரன்களே தேவைப்பட்டநிலையில் மந்தனா 81 ரன்களில் (47 பந்துகள்) (10 பவுண்டரிகள், 3 சிக்சர்கள்) ஆட்டமிழந்தார்.
இறுதியில் ரிச்சா கோஸ் 11 ரன்களும், எலிஸ் பெர்ரி 7 ரன்களும் எடுத்து கடைசிவரை ஆட்டமிழக்காமல் களத்தில் இருந்தனர். முடிவில் பெங்களூரு அணி 16.2 ஓவர்களில் 2 விக்கெட்டுகளை இழந்து 146 ரன்கள் எடுத்தது. டெல்லி அணியின் சார்பில் அருந்ததி ரெட்டி மற்றும் ஷிகா பாண்டே ஆகியோர் தலா ஒரு விக்கெட் வீழ்த்தினர்.
இதன்மூலம் டெல்லி கேப்பிடல்ஸ் அணிக்கு எதிரான போட்டியில் 8 விக்கெட்டுகள் வித்தியாசத்தில் பெங்களூரு அணி அபார வெற்றிபெற்றது.