ரீ ரீலிஸ் டிரெண்ட்டில் அடுத்ததாக இந்த வாரம் ̀பாஸ் (எ) பாஸ்கரன்’ திரைப்படம் வெளியாகிறது. இப்படியான ரீ ரிலீஸ் பழைய திரைப்படங்களின் அதே நாஸ்டால்ஜிய நினைவுகளையும் மீண்டும் நம் கண் முன்னே நிறுத்தும். ̀பாஸ் (எ) பாஸ்கரன்’ திரைப்படத்திற்கு இன்று வரை அதன் ரிப்பீடட் வேல்யூ குறையவில்லை என்றே சொல்லலாம்.
ஆர்யா – சந்தானம் காமெடி, யுவன் பாடல்கள், ஐகானிக் வசனங்கள் எனப் படத்தை மீண்டும் மீண்டும் பார்க்க வைப்பதற்கு ஹைலைட்டான விஷயங்கள் பல இருக்கின்றன. படம் தொடர்பான பலரும் அறிந்திடாத தகவல்களைத் தெரிந்துக் கொள்ள இயக்குநர் எம். ராஜேஷைத் தொடர்புக் கொண்டோம். முதலில், “சமீபத்தில் விகடன் பிரஸ் மீட்டில் நடிகர் ஜீவா சீட்டுக் குலுக்கிப் போட்டுப் பார்த்து இப்படத்திற்குக் கதாநாயகனைத் தேர்வு செய்தார்கள் எனக் கூறியிருந்தாரே…” எனக் கேட்டதும், ̀̀(சிரித்து கொண்டே…) இந்த தகவல் அவருக்குப் போயிருக்கு.
“எனக்குமே அதைப் பத்தி தெரியல. பாஸ் (எ) பாஸ்கரன் படத்தோட தயாரிப்பு நிறுவனம்தான் ஆர்யாவோட ̀நான் கடவுள்’ படத்தைத் தயாரிச்சாங்க. ஜீவாவுடைய ̀வந்தான் வென்றான்’ படத்தையும் அவங்கதான் தயாரிச்சாங்க. இந்த ரெண்டு ஹீரோவோட டேட்டும் அவங்ககிட்ட இருந்தது. இந்தப் படத்தோட கதையை நான் முதல்ல சீரியஸாகதான் எழுதியிருந்தேன். அதே சமயம் சில நகைச்சுவைக்கான விஷயங்களும் படத்துல இருந்தது. சீரியஸ் கதையைத்தான் நான் ஆர்யாகிட்ட சொன்னேன். அப்படித்தான் கடைசி வரைக்கும் படத்துக்கான வேலைகளும் நடந்தது.
கடைசி தருணத்துலதான் இந்தப் படத்தை காமெடி வச்சு டிரீட் பண்ணலாம்னு யோசிச்சு ஆர்யாகிட்ட சொன்னேன். அவருக்கும் அது பிடிச்சிருந்தது. சொல்லப்போனால், இந்தப் படத்தை அப்போ இளைஞர்கள் பலரும் தங்களோட தொடர்புபடுத்திகிட்டாங்க. இன்னைக்கு வேலைவாய்ப்புகள் அதிகமாக இருக்கு. இன்னைக்கு ஒரு பைக் இருந்தாலே போதும் ஒரு வேலை வந்திடும். ஆனால், அப்போ அப்படி கிடையாது. படிச்சு முடிச்சிட்டு வீட்டுல சும்மா இருப்பாங்க. சிலர், அரியர் வச்சிட்டு வீட்டுல இருப்பாங்க. இப்படியான நிலையில இருக்கிற இளைஞர்கள் பலரும் அப்போ இந்தக் கதையை கனெக்ட் பண்ணிக்கிட்டாங்க.” என்றவர், ̀ ̀பாஸ் (எ) பாஸ்கரன் திரைப்படம் என் மனதுக்கு ரொம்பவே நெருக்கமானது. கும்பகோணம் லொகேஷனும் எங்களுக்கு உதவி பண்ணுச்சுனு சொல்லலாம். எனக்கு ரொம்ப பிடிச்ச ஊர் அது.
இன்னைக்கும் அந்த ஊர்ல சில இடங்களை ̀பாஸ் (எ) பாஸ்கரன்’ ஷூட்டிங் ஸ்பாட்னு சொல்றாங்க. எப்படி ̀சிவா மனசுல சக்தி’ படத்துல சென்னையை எக்ஸ்ப்ளோர் பண்ணினமோ, அதே மாதிரி இந்த படத்துல கும்பகோணம். அதே மாதிரி இன்னொரு விஷயமும் இப்போ படத்தைப் பற்றி என் நினைவுல இருக்கு. இந்தப் படத்தோட எடிட் முடிச்சிட்டு ஆர்யாகிட்ட ̀மச்சா எடிட் முடிஞ்சிடுச்சு. பார்த்திடுறீயா’னு நான் கேட்டேன். ̀நான் ஷூட்ல இருக்கிறேன். நான் ஃப்ரீ ஆகும்போது வந்து பார்த்திடுறேன்’னு சொன்னாரு. அப்புறம் தயாரிப்பாளரைப் பார்க்க வந்தவர் எடிட்ல படத்தைப் பார்த்துட்டு அவருக்குப் படம் பிடிச்சு அவருடைய ̀தி ஷோ பிபுள்’ நிறுவனத்தின் மூலமாகவே ரிலீஸ் பண்றேன்னு தயாரிப்பாளர்கிட்ட பேசியிருக்கிறார்.
இந்த விஷயம் எனக்குத் தெரிஞ்சதுக்கு அப்புறம் ரொம்பவே சப்ரைஸிங்காக இருந்தது.” என்றவரிடம், “இந்த திரைப்படத்திற்குப் பிறகுதான் மொட்டை ராஜேந்திரன் காமெடியனாக தமிழ் சினிமாவில் ஒரு ரவுண்ட் வந்தார். அவரை காமெடி பக்கம் கொண்டு வந்த கதை பற்றி சொல்லுங்கள்” எனக் கேட்டோம்.
அவர், “நான் கடவுள் படத்துல மொட்டை ராஜேந்திரனோட தோற்றமும், குரலும் தனித்துவமாக இருந்தது. எனக்கு அந்தக் கதாபாத்திரத்துக்கு சீரியஸாக இருக்கிற ஒருத்தர்தான் தேவைப்பட்டது. முதல்ல இந்தப் படத்துக்கு கேட்கும்போது அவர், ‘எனக்கு காமெடிலாம் வராது. என்னை விட்டுடுங்க’னு சொன்னாரு. ஆனால், நான் மறுபடியும் கடைசியாகப் போய்க் கேட்டேன். ̀ஏன் டைரக்டர் சார் இப்படி பண்றீங்க’னு கேட்டாரு. அப்புறம் பேசினதும் நடிக்கிறதுக்கு ஒத்துகிட்டாரு. அவர் மாதிரியே சுவாமிநாதனுக்கும் இந்த படம் பிரேக் கொடுத்தது.
இந்தப் படத்துக்குப் பிறகு ரொம்பவே அவர் பிஸியாகிட்டாரு. சுப்பு சாருக்கும் இந்த படம் ரீ எண்ட்ரிதான்.” என்றவரிடம், ̀யுவன் – ராஜேஷ் – நா.முத்துக்குமார்’ கூட்டணிக்கு இப்போ வரைக்கும் ரசிகர்கள் இருக்காங்களே. இந்தப் படத்துக்குப் பாடல்களுக்கு எந்தளவுக்குப் பலமானதாக இருந்திருக்கு?” எனக் கேட்டதும், “ஆமா, படத்துக்குப் பாடல்கள் ரொம்பவே பலமாக இருந்தது. நாங்க மூணு பேரும் சேர்ந்து வொர்க் பண்ணியிருக்கோம். இந்தப் படத்துல வர்ற ̀யார் இந்தப் பெண்தான்’ பாடல் பெரியளவுல ஹிட்டாச்சு. அந்த மெலடி பாடலைக் கேட்கும்போதே கண்டிப்பாக ஹிட் ஆகும்னு தெரியும். அதே மாதிரி படத்துல `A+B’ பாடல் ரீ ரெக்கார்டிங்ல போட்டுக் கொடுத்தாரு. அந்தப் பாடலுமே படத்துக்குப் பெரிய ப்ளஸாக இருந்துச்சு!” எனக் கூறி முடித்துக் கொண்டார்.
வேட்டை நாய்கள் – Gangs of தூத்துக்குடி -இப்போது விகடன் ப்ளேயில்..!
Link : Part 01 : https://tinyurl.com/Vettai-Naigal-Part-01 |
Part 02: https://tinyurl.com/Vettai-Naigal-Part-02 |
80களில் தூத்துக்குடியை மிரள வைத்த டான்களின் கதை வேட்டை நாய்கள் – Gangs of தூத்துக்குடி இப்போது Audio formatல் உங்கள் Vikatan Playல். இப்பவே Vikatan APPஐ Download செய்யுங்கள் Play Iconஐ Click பண்ணி வேட்டை நாய்கள் கேளுங்க | #Vikatan #VikatanPlay #AudioBooks