`பிகில்’ திரைப்படத்தின் மூலம் வெள்ளித்திரையில் அறிமுகமானவர் ரோபோ சங்கரின் மகள் இந்திரஜா. திரைப்படங்களில் நடித்து வந்த இவர் கார்த்திக் என்பவரை கடந்த வருடம் திருமணம் செய்துகொண்டார். திருமணத்திற்குப் பிறகு இந்திரஜா மற்றும் கார்த்திக் இருவரும் விஜய் டிவி நிகழ்ச்சி ஒன்றில் ஜோடியாகக் கலந்து கொண்டனர்.
அந்த நிகழ்ச்சியில் இவர்கள் கலந்துகொண்ட சில வாரங்கள் கடந்ததும் இந்திரஜா கர்ப்பமாக இருந்தார். இதனால் அந்த நிகழ்ச்சியில் பாதியிலேயே இந்திரஜாவும் அவருடைய கணவரும் வெளியேறிவிட்டனர். அவர்களுக்கு சமீபத்தில்தான் ஆண் குழந்தை பிறந்தது.
இந்நிலையில் இந்திரஜா – கார்த்திக்கின் குழந்தைக்கு நடிகர் கமல்ஹாசன் ‘நட்சத்திரன்’ என்று பெயர் வைத்திருக்கிறார். இதனை இந்திரஜா- கார்த்திக் இருவரும் தங்களது இன்ஸ்டாகிராம் பக்கத்தில் பகிர்ந்திருக்கின்றனர்.
அவர் வெளியிட்டிருக்கும் பதிவில், ” எங்களுடைய வாழ்க்கையின் அர்த்தமான எங்கள் மகனுக்கு…உலக நாயகன், நம்மவர், அன்பு தலைவர், பத்ம பூஷன் Dr. கமல் ஹாசன் @ikamalhaasan அவர்கள் தம்பிக்கு “நட்சத்திரன்” என பெயரிட்டு வாழ்த்தினார்…என்றும் உங்கள் அன்புடன்எங்கள் நட்சத்திரன் கார்த்திக்..” என்று நெகிழ்ச்சியாகப் பதிவிட்டிருக்கிறார்.