புதுடெல்லி,
வக்பு சொத்துகளை ஒழுங்குபடுத்துவதற்காக, வக்பு சட்ட திருத்த மசோதாவை நாடாளுமன்ற மக்களவையில் மத்திய சிறுபான்மையினர் விவகாரத்துறை மந்திரி கிரண் ரிஜிஜு தாக்கல் செய்தார். அந்த மசோதா, முஸ்லிம்களுக்கு எதிரானது என்றும், வக்பு சொத்துகளை முறைகேடாக அபகரிக்கும் நோக்கம் கொண்டது என்றும் எதிர்க்கட்சிகள் கடும் எதிர்ப்பு தெரிவித்தன.
அதனால், நாடாளுமன்ற கூட்டுக்குழு ஆய்வுக்கு மசோதா அனுப்பி வைக்கப்பட்டது. அக்குழு, பல்வேறு திருத்தங்களுடன் மசோதாவையும், தனது அறிக்கையையும் மத்திய அரசிடம் சமர்ப்பித்தது.
இந்நிலையில், ரம்ஜான் விடுமுறைக்கு பிறகு நாடாளுமன்ற பட்ஜெட் கூட்டம் இன்று (செவ்வாய்க்கிழமை) மீண்டும் நடக்கிறது. 4-ந் தேதியுடன் கூட்டத்தொடர் முடிவடைகிறது. இதற்கிடையில், வக்பு வாரிய திருத்தச் சட்ட மசோதாவை நாடாளுமன்றத்தில் நாளை தாக்கல் செய்ய மத்திய அரசு திட்டமிட்டுள்ளது.
வக்பு மசோதா தாக்கல் குறித்து கிரண் ரிஜிஜு கூறியதாவது:-
1-ந் தேதி நாடாளுமன்றம் கூடிய பிறகு, திருத்தப்பட்ட வக்பு மசோதாவை தாக்கல் செய்வதற்கான நேரம் முடிவு செய்யப்படும். அநேகமாக, 2-ந் தேதி (புதன்கிழமை) தாக்கல் செய்யப்பட வாய்ப்புள்ளது. கூடிய விரைவில் மசோதாவை நிறைவேற்ற விரும்புகிறோம்.
4-ந் தேதியுடன் கூட்டத்தொடர் முடிவடைவதால், இரு அவைகளிலும் நிறைவேற்றினால்தான் அது சட்டமாக மாறும். வக்பு மசோதாவுக்கு சில அரசியல் கட்சிகளும், அமைப்புகளும் எதிர்ப்பு தெரிவித்து வருகின்றன. மக்களிடம் பொய்களை பரப்பி, பதற்றத்தை விதைத்து வருகின்றன. முஸ்லிம்களை வீதிக்கு வந்து போராடுமாறு தூண்டுவது நாட்டுக்கு நல்லது அல்ல. வக்பு மசோதா, சட்டமாக மாறினால், மசூதிகள் போன்ற முஸ்லிம் சொத்துகளை மத்திய அரசு பறித்துக் கொள்ளும் என்று பொய் பிரசாரம் செய்யப்படுகிறது.
இந்த மசோதா, பெரும்பாலான முஸ்லிம்கள் நலன்களுக்கு ஏற்றது. வக்பு சொத்துகளை சுரண்டும் சில தலைவர்கள் மட்டுமே எதிர்க்கின்றனர். வக்பு மசோதாவை ஆளும் கூட்டணி மட்டுமின்றி, ‘இந்தியா’ கூட்டணியை சேர்ந்த சில எம்.பி.க்களும் ஆதரிக்கின்றனர். கேரள கத்தோலிக்க பேராயர்கள் கவுன்சில் போன்ற அமைப்புகளும் ஆதரவு தெரிவித்துள்ளன. இவ்வளவு விரிவான ஆலோசனைக்கு பிறகு எந்த மசோதாவும் நிறைவேற்றப்பட்டது இல்லை. இவ்வாறு அவர் கூறினார்.