புதுடெல்லி: நாடாளுமன்றத்துக்கு மேலாக எந்தவொரு அதிகாரமும் அரசியலமைப்பில் காட்சிப்படுத்தப்படவில்லை என்றும், நாடாளுமன்றம்தான் உச்ச நிலை என்றும் குடியரசு துணைத் தலைவர் ஜக்தீப் தன்கர் தெரிவித்துள்ளார்.
டெல்லி பல்கலைக்கழகத்தில் இன்று நடைபெற்ற இந்திய அரசியலமைப்பின் 75 ஆண்டுகளை நினைவுகூரும் ‘கர்த்தவ்யம்’ நிகழ்ச்சியில் சிறப்பு விருந்தினராகக் கலந்து கொண்டு உரையாற்றிய ஜக்தீப் தன்கர், அரசியலமைப்பு பதவிகள் அலங்காரத்துக்கானதாக இருக்கலாம் என்று சிலர் சமீபத்தில் கூறியது நினைத்துப் பார்க்க முடியாத ஆச்சரியமாக உள்ளது. என்னைப் பொறுத்தவரை, ஒரு குடிமகன் மிக உயர்ந்தவர். ஏனென்றால் எந்த ஒரு நாடும் ஜனநாயகமும் குடிமக்களால்தான் கட்டமைக்கப்படுகின்றன. ஜனநாயகத்தின் ஆன்மா ஒவ்வொரு குடிமகனுக்குள்ளும் இடம் பெற்றுள்ளது.
நாடாளுமன்றத்துக்கு மேலாக எந்தவொரு அதிகாரமும் அரசியலமைப்பில் காட்சிப்படுத்தப்படவில்லை. நாடாளுமன்றம்தான் உச்ச நிலை. நாட்டின் ஒவ்வொரு தனி மனிதனைப் போலவே இதுவும் உயர்ந்தது.
மக்களை விட யாரும் உயர்ந்தவர்கள் அல்ல. மக்களாகிய நாம், அரசியலமைப்பின் கீழ், நமது விருப்பத்தை மக்கள் பிரதிநிதிகள் மூலம் பிரதிபலிக்க தேர்வு செய்துள்ளோம். ‘நெருக்கடி நிலையை’ அமல்படுத்திய பிரதமர் 1977இல் அதற்கு பொறுப்பாக்கப்பட்டார். எனவே, இதில் எந்த சந்தேகமும் வேண்டாம். ஏனெனில் அரசியலமைப்பு மக்களுக்கானதாகும்.
ஒரு ஜனநாயகத்தின் ஆரோக்கியம் என்பது, உரையாடலின் தரத்தில்தான் இருக்கிறது. நமது உரையாடலின் தரம்தான் நமது ஜனநாயகத்தை வரையறுக்கிறது. நமது இளைஞர்கள் கட்சி சார்புக்கு அப்பால் சிந்திக்கவும், விவாதிக்கவுமான அளவுக்கு உயர வேண்டும். நீங்கள் கட்சி சார்புடைய நலன்களுக்கு கட்டுப்பட முடியாது. நீங்கள் தேசிய நலன்களை மட்டுமே நம்ப வேண்டும்.
சுதந்திரம் பொறுப்பை கோருகிறது என்பதை டாக்டர் அம்பேத்கர் அங்கீகரித்தார். அதனால்தான் நமது அரசியலமைப்பில் அடிப்படை உரிமைகள் மற்றும் அடிப்படைக் கடமைகள் இரண்டும் உள்ளன.
இந்த நாடு நம்முடையது என்பதால், நாம் எப்போதும் நமது உரிமைகளை விட நமது கடமைகளுக்கு முன்னுரிமை அளிக்க வேண்டும்.
தேசியவாதம் என்பது கலப்படமற்ற ஒரு உறுதிப்பாட்டைக் கோருகிறது. தன்னார்வமாக வெளிப்படும் ஒரு உறுதிப்பாடு அது. குடிமக்கள் அர்ப்பணிப்புடன் கடமைகளைச் செய்வதன் மூலம் மட்டுமே புதிய இந்தியா உருவாகும்.
நேர்மைக்குப் பதிலாக, ஒருபோதும் வசதியைத் தேர்ந்தெடுக்க வேண்டாம். என்னை நம்புங்கள், குறுக்குவழியை எடுத்தால், தற்காலிக வெற்றி கிடைக்கலாம், ஆனால் நீங்கள் அதன் பாதையில் செல்லும்போது, நீங்கள் ஒருபோதும் அதிலிருந்து வெளியேற மாட்டீர்கள்” என தெரிவித்தார்.
டெல்லி பல்கலைக்கழக துணைவேந்தர் யோகேஷ் சிங், டெல்லி பல்கலைக்கழக கல்லூரி முதல்வர் பேராசிரியர் பலராம் பாணி, டெல்லி பல்கலைக்கழக தெற்கு டெல்லி வளாகத்தின் இயக்குநர் பிரகாஷ் சிங் உள்ளிட்டோர் இந்நிகழ்ச்சியில் கலந்து கொண்டனர்.