மும்பை:மும்பையை சேர்ந்த நடிகை காவ்யா தாப்பர் (26), தமிழ், இந்தி உட்பட பல படங்களில் நடித்துள்ளார். தமிழில் சரண் இயக்கிய மார்க்கெட் ராஜா எம்.பி.பி.எஸ். என்ற தமிழ் படத்தில் வாணி என்ற கதாபாத்திரத்தில் நடித்தவர். தெலுங்கு படங்களிலும் நடித்துள்ளார். நேற்று அதிகாலை 1 மணிக்கு நடிகை காவ்யா ஜூகுவில் மது அருந்திவிட்டு காரை ஓட்டிச் சென்றார். ஜே.டபிள்யூ மாரியாட் ஓட்டல் அருகில் வரும் போது இவரது கார் கட்டுப்பாட்டை இழந்தது. தாறுமாறாக ஓடிய கார், சாலை ஓரம் நிறுத்தப்பட்டிருந்த வேறு ஒரு காரின் பின்பக்கம் மோதி விபத்து ஏற்பட்டது. தகவலறிந்து வந்த பெண் போலீஸ் அதிகாரி விசாரணை நடத்தினார். அப்போது காவ்யா, பெண் போலீஸ் அதிகாரியை திட்டியதோடு, அவரது சட்டை காலரை பிடித்து இழுத்து, ஓங்கி குத்து விட்டார். இதில் பெண் போலீஸ் அதிகாரியின் பல் உடைந்து விட்டது. இதனை தொடர்ந்து காவ்யாவை கைது செய்த போலீசார் அவர் மீது வழக்கு பதிவு செய்து நீதிமன்றத்தில் ஆஜர்படுத்தினர். காவ்யாவை நீதிமன்ற காவலில் வைக்க நீதிபதி உத்தரவிட்டார். இதனை தொடர்ந்து அவர் சிறையில் அடைக்கப்பட்டார்.