காங்கிரஸ்
கட்சியின் தோல்விக்கு பொறுப்பேற்று சோனியா காந்தி,
ராகுல் காந்தி
,
பிரியங்கா காந்தி
ஆகியோர் ராஜினாமா செய்து விட்டால் மட்டும் அக்கட்சிக்கு புத்துயிர் கிடைத்து விடுமா என்று கேட்டால் நிச்சயம் இல்லை என்று பதிலைத்தான் நாம் பெற முடியும்.
நிதர்சனம் அப்படி. காங்கிரஸ் கட்சியைப் பொறுத்தவரை சரியான இரண்டாம் நிலைத் தலைவர்கள் தேசிய அளவில் உருவாகவில்லை. ஏற்கனவே இருந்த பல திறமையான தலைவர்கள் ஒன்று ஓய்வு பெற்று விட்டனர் அல்லது ஓய்ந்து போய் விட்டனர். இதுதான் உண்மை.
சோனியா காந்தி ஆக்டிவான ஒரு தலைவராக வலம் வந்தபோது அவருக்கு லெப்ட், ரைட் என்று சிறப்பான 2ம் நிலைத் தலைவர்கள் இருந்தனர். பிரணாப் முகர்ஜி இருந்தார், குலாம் நபி ஆசாத் இருந்தார். ஏ.கே.அந்தோணி இருந்தார்.. பல மூத்த தலைவர்கள் ஆக்டிவாக இருந்தனர். அருமையான பிரதமராக மன்மோகன் சிங் இருந்தார்.
சோனியா விலகி ராகுல் காந்தி அந்த பொறுப்புக்கு வந்தபோது “ஜெனரேஷன் கேப்” ஒரு பிரச்சினையாக உருவெடுத்தது. சின்னப் பையன் சொல்வதை நாம் கேட்பதா என்ற மன நிலைக்கு பல தலைவர்கள் மாறினர். இது ராகுல் காந்தியின் தடையற்ற செயல்பாட்டுக்கு இடையூறாக அமைந்தது. சரி, அவர் வயது இளம் தலைவர்களுடன் இணைந்து செயல்படலாம் என்றால் திறமையான இளம் தலைவர்கள் அவருக்குக் கிடைக்கவில்லை. கிடைத்தவர்களும் உருப்படியாக இல்லை. இங்குதான் காங்கிரஸ் தலைமையும், நிர்வாகமும் பெரும் தடுமாற்றத்துக்குள்ளாகியது.
காங்கிரஸ் கட்சியைப் பொறுத்தவரை பெரும்பாலும் மூத்த தலைவர்கள்தான் அதிகம் இருப்பார்கள். வயதானவர்கள் அதிகம் உள்ள கட்சி என்றும் காங்கிரஸுக்கு இன்னொரு பெயர் உண்டு. இப்படிப்பட்ட கட்சியில், இளம் தலைவர்கள் வசம் தலைமைப் பொறுப்பைக் கொடுக்கும்போது இந்த ஜெனரேஷன் கேப் பிரச்சினயையை சரி செய்வதிலும் சற்று கூடுதல் அக்கறை காட்டியிருந்தால் ராகுல் காந்திக்குப் பிரச்சினை வந்திருக்காது.
ராகுல் காந்திக்கு காங்கிரஸ் கட்சி நிறைய வாய்ப்புகளைக் கொடுத்தது என்பது உண்மைதான். ஆனால்
பாஜக
என்ற இரும்பு யானையை எதிர்த்து அவர் மோதினார். அப்படி மோதும்போது என்ன மாதிரியான வலுவுடன் அவர் மோதியிருக்க வேண்டும் என்ற கேள்வி எழுகிறது. அப்படி அவர் மோதினாரா என்று கேட்டால் இல்லை என்றுதான் சொல்ல முடியும். பாஜகவை எதிர்த்து மோதும் மன நிலையில் ராகுல்காந்தி இருந்தாலும் அவருக்கான ஆதரவு அந்த அளவுக்கு வலுவானதாக இல்லை. எப்போதும் அவரை விமர்சித்துக் கொண்டும், எதற்கெடுத்தாலும் குத்திக் காட்டிக் கொண்டும், ஏதாவது உருப்படியில்லாத கேள்விகளைக் கேட்கும் தலைவர்கள்தான் அவருக்கு பின்னால் இருந்தனர். பிறகெப்படி ராகுல் காந்தியால் சிறப்பாக செயல்பட முடியும்.. நிச்சயம் முடியாது.
முதலில் கட்சிக் கட்டுப்பாட்டை மீறுவோர் மீது அதிரடியான நடவடிக்கைகளை மேற்கொள்ள வேண்டும். கட்சியின் நலனுக்காக என்று கூறி கும்பலாக கூடி கட்சித் தலைமைக்கு கடிதம் எழுதுவது, பொது வெளியில் விவாதிப்பது போன்ற செயல்களில் ஈபடுவோரை கட்சியை விட்டுத் தூக்கி எறிய வேண்டும். சில நேரங்களில் இருப்புக் கரம் கொண்டும் சிலவற்றை அடக்க வேண்டும். அன்பு காட்ட வேண்டிய இடத்தில் அதை காட்டினால் போதும். எல்லா நேரமும் அன்பு பாராட்ட வேண்டிய அவசியம் இல்லை. அப்படி செய்தால் கட்சியை நடத்த முடியாது. மக்களின் அபிமானத்தைப் பெறவும் முடியாது.
பிரியங்கா காந்தி மிக மித தாமதமாக அரசியலுக்குக் கொண்டு வரப்பட்டவர். ராகுல் காந்திக்கு முன்பாகவே அவரை கொண்டு வந்திருக்க வேண்டும். லேட்டாக கொண்டு வரப்பட்ட பிரியங்காவை, உ.பிக்கான தலைவராகவே மையப்படுத்தி அடையாளப்படுத்தி வைத்திருக்கிறது காங்கிரஸ் தலைமை. இதனால் அவரை அகில இந்திய அரசியலுக்கான தலைவராகவே பலரால் பார்க்க முடியவில்லை. குறிப்பாக தென் மாநிலங்களில் ராகுல் காந்திக்கு இருக்கும் ஆதரவை விட பிரியங்காவுக்கு ஆதரவு குறைவே.
சோனியா காந்திக்கு அடுத்து யார் என்ற பேச்சு வந்தபோது ராகுல் காந்தி என்றுதான் பல காங்கிரஸாரும் சொல்லி வந்தனர். இதனால்தான் ராகுல் காந்தி தலைவராக்கப்பட்டார். ஆனால் வெறும் தலைவர் மட்டும் இருந்தால் போதுமா.. போதிய அளவில் 2ம் கட்டத் தலைவர்கள், இவர்களை இணைத்து வழி நடத்த வைப்ரன்ட் ஆன ஒரு கமிட்டி… தெளிவாக எடுக்கப்படும் முடிவுகள் என பல அம்சங்கள் இருக்கின்றன. இவையெல்லாம் சரியாக அமைந்தால்தான் அந்தத் தலைமை எடுக்கும் நடவடிக்கைகளும் சரியாக இருக்கும்.. செயல்பாடும் சீராக போகும். பாஜக இதில் கில்லாடியாக இருக்கிறது.
எல்லாவற்றிலும் தெளிவாக இருக்கிறார்கள். தலைமை சொல்வதை தட்டாமல் கேட்கும் தொண்டர்கள் கூட்டம் அவர்களிடம் இருக்கிறது. கட்சியின் உயர் மட்டத் தலைமை எடுக்கும் முடிவுகள் அடிமட்டத் தொண்டர்கள் வரை ஒரு மாற்றமும் இல்லாமல் அப்படியே போய்ச்சேருகிறது. எங்குமே பிசிறு அடிப்பதில்லை. மிகத் தெளிவாக செயல்படுகிறார்கள். கட்டுக்கோப்பாக வேலை பார்க்கிறார்கள். காங்கிரஸால் ஏன் இப்படி செய்ய முடிவதில்லை என்பது ஆய்வுக்குரிய ஒன்று.
பாஜக சர்வாதிகார கட்சி. காங்கிரஸ் அப்படி இல்லை, ஜனநாயகத்தை மதிக்கும் கட்சி. பாஜக போலெல்லாம் காங்கிரஸால் செயல்பட முடியாது என்று சப்பைக்கட்டு வாதமெல்லாம் இனியும் செல்லுபடியாகாது. முதலில் நம் மீது மக்களுக்கு நம்பிக்கை வர வேண்டும். அதற்கு நாம் தெளிவாக இருக்க வேண்டும். பாஜக அதைத்தான் செய்கிறது. தன் மீது மக்களுக்கு நம்பிக்கை வரும் வகையில் அது தெளிவாக செயல்படுவதால்தான் அதை நம்பி பலர் பின் செல்கிறார்கள். காங்கிரஸ் தெளிவாக இருந்தால் ஏன் பாஜக பக்கம் போகப் போகிறார்கள். எனவே பாஜக வகுத்துள்ள புதிய அரசியலை முறியடிக்க வேண்டுமானால் பாஜக போல திட்டமிட்டு தெளிவுடன் செயல்பட்டால் மட்டுமே முடியும். இல்லாவிட்டால் பாஜகவின் அதிரடியில் சிக்கி அழிந்துதான் போக நேரிடும். ஒவ்வொரு தேர்தல் முடிவும் காங்கிரஸுக்குக் கற்றுக் கொடுத்து வரும் பாடம் இதுதான்.. ஆனால் காங்கிரஸ்தான் இன்னும் சுதாரிக்காமல் உள்ளது.
எனவே சோனியா இருக்க வேண்டுமா, ராகுல போக வேண்டுமா.. பிரியங்கா வேண்டவே வேண்டாமா என்று வாதம் புரிந்து கொண்டிருப்பதை விட்டு விட்டு, தலைவர்கள் சொல்வதைக் கேட்கும் கட்சியாக காங்கிரஸை மாற்றி, மக்களுக்கான பொறுப்பை உணர்ந்து கட்சியை ஆக்கப்பூர்வமானதாக செயல்பட வைக்கும் வகையிலான மாற்றங்கள் குறித்து காங்கிரஸ் சிந்திக்கத் தொடங்க வேண்டும். கட்சியின் வெற்றிக்கும் தோல்விக்கும் சோனியா முதல் கட்சியின் அடிமட்டத் தொண்டர்கள் வரை அனைவரும்தான் பொறுப்பாக முடியும். அந்த மூவர் மட்டும் எல்லாவற்றுக்கும் காரணாக இருக்க முடியாது. அவகாசம் அதிகம் இல்லை.. இதோ 2024 நெருங்கி விட்டது. இப்போதே வேலையை ஆரம்பித்தால்தான் ஏதாவது நடக்கும்.. இல்லாவிட்டால் மீண்டும் மீண்டும் அடியே கிடைக்கும்.