கர்நாடக மாநிலம் உடுப்பி அரசு மகளிர் பி.யூ. கல்லூரியில் கடந்த ஆண்டு டிசம்பர் மாதம் ஹிஜாப் அணிந்து வந்த 6 முஸ்லிம் மாணவிகளுக்கு வகுப்பறையில் நுழைய அனுமதி மறுக்கப்பட்டது. இதனால் கல்லூரி நிர்வாகத்தைக் கண்டித்து 6 மாணவிகளும் ஹிஜாப் அணிந்து தர்ணாவில் ஈடுபட்டனர்.
அத்துடன், கல்லூரி நிர்வாகம் தங்களது உடை விவகாரத்தில் தலையிடுவதாக கர்நாடக உயர் நீதிமன்றத்தில் வழக்கு தொடர்ந்தனர். இதனிடையே, மாணவர்கள் உரிய பள்ளி சீருடையில் மட்டுமே பள்ளிக்கு வர வேண்டும் என்று கர்நாடக அரசு சார்பில் உத்தரவு பிறப்பிக்கப்பட்டது. தொடர்ந்து, கடந்த பிப்ரவரி 5ஆம் தேதி இது தொடர்பாக அரசாணையையும் அம்மாநில பாஜக அரசு பிறப்பிதத்து.
இதனிடையே, ஹிஜாப் வழக்கில் தீர்ப்பு வழங்கிய கர்நாடக உயர் நீதிமன்றம், ஹிஜாபுக்கு கர்நாடக அரசு விதித்த தடை செல்லும் உத்தரவிட்டுள்ளது. மேலும், ஹிஜாப் தடைக்கு எதிரான வழக்குகளையும்
கர்நாடக உயர் நீதிமன்றம்
தள்ளுபடி செய்துள்ளது. கர்நாடக பள்ளி, கல்லூரிகளில் ஹிஜாப் அணிய தடை விதித்து கர்நாடக அரசு கடந்த பிப்ரவரி 5ஆம் தேதி வெளியிடப்பட்ட அரசாணை செல்லும் எனவும் உயர் நீதிமன்றம் தெரிவித்துள்ளது. இந்த உத்தரவை எதிர்த்து 6 மாணவிகளும் உச்ச நீதிமன்றத்தில் மேல் முறையீடு செய்துள்ளனர்.
அதேசமயம், ஹிஜாப் தீர்ப்பை எதிர்த்து பல்வேறு இடங்களில் போராட்டங்களும் நடைபெற்று வருகின்றன. அதன்படி, மதுரையில் நடந்த ஒரு கண்டனக் கூட்டத்தின் வீடியோ சமூக வலைதளங்களில் வைரலானது. அதில் பேசிய தமிழ்நாடு தவ்ஹீத் ஜமாத் தணிக்கைக் குழு உறுப்பினர் கோவை ரஹ்மத்துல்லாஹ் ஜார்கண்டில் காலை நடைபயிற்சியின் போது தவறான தீர்ப்பு வழங்கிய நீதிபதி கொல்லப்பட்டதாக உள்ளது. மேலும், “எங்கள் சமூகத்தில் உணர்ச்சிவசப்பட்ட சிலர் இருக்கிறார்கள். அவர்களுக்கு (நீதிபதிகளுக்கு) ஏதாவது நேர்ந்தால், எங்களை குற்றம் சாட்டுவதற்கான சந்தர்ப்பத்திற்காக பாஜக காத்திருக்கிறது” என்றும் அவர் பேசியுள்ளது போன்று அந்த வீடியோவில் உள்ளது.
அதேபோல், தஞ்சாவூரில் நடைபெற்ற போராட்டத்தின்போது, கர்நாடக உயர்நீதிமன்ற நீதிபதிகள், பிரதமர் நரேந்திர மோடி, உள்துறை அமைச்சர் அமித் ஷா மற்றும் உத்தரப்பிரதேச முதல்வர் யோகி ஆதித்யநாத் ஆகியோருக்கு எதிராக, தமிழ்நாடு தவ்ஹீத் ஜமாத் தலைமையக பேச்சாளர் ஜமால் முகமது உஸ்மானி தரக்குறைவான கருத்துகளை தெரிவித்ததாகவுகவும் கூறப்படுகிறது.
இதையடுத்து, ஹிஜாப் வழக்கில் தீர்ப்பளித்த கர்நாடக உயர் நீதிமன்ற நீதிபதிகளுக்கு மிரட்டல் விடுத்ததாக, கோவை ரஹ்மத்துல்லா என்பவர் திருநெல்வேலியிலும், ஜமால் முகமது உஸ்மானி தஞ்சாவூரிலும் கைது செய்யப்பட்டனர். இந்த நிலையில், ஹிஜாப் வழக்கில் தீர்ப்பு வழங்கிய கர்நாடக உயர் நீதிமன்ற நீதிபதிகளுக்கு
ஒய் பிரிவு பாதுகாப்பு
வழங்க அம்மாநில முதல்வர் உத்தரவிட்டுள்ளார். நீதிபதிக்கு கொலை மிரட்டல் விடுத்ததாக தந்த புகாரை முழுமையாக விசாரிக்கவும் கர்நாடக முதல்வர் பசவராஜ் பொம்மை வலியுறுத்தியுள்ளார்.