விமானத் தாக்குதலை கடந்த பல நாட்களாக மட்டுப்படுத்தி வைத்திருந்த ரஷ்யா தற்போது மீண்டும் விமானத் தாக்குதலை அதிகரித்திருப்பதாக உக்ரைன் ராணுவம் தெரிவித்துள்ளது.
26 நாட்களுக்கு முன்பு உக்ரைன் மீதான போரைத் தொடங்கியது ரஷ்யா. போர் தொடங்கியதுமே விமானப்படை மூலம் சரமாரியான தாக்குதல் நடத்தி உக்ரைன் விமான தளங்களை காலி செய்தது ரஷ்யா. அதேசமயம், ராணுவம், கடற்படை ஆகியவற்றையும் முழு வீச்சில் தாக்குதலில் இறக்கியது. இதனால் உக்ரைன் பெரும் தடுமாற்றத்தை சந்தித்தது.
ஆனால் திடீரென விமானப்படையை மட்டும் தாக்குதலிலிருந்து விலக்கி வைத்தது ரஷ்யா. ராணுவத்தை மட்டும் முழுமையாக பயன்படுத்தியது. இதனால் மேற்கத்திய நாடுகள் குழப்பமடைந்தன. விமானப்படையை ஏன் ரஷ்யா பயன்படுத்தாமல் நிறுத்தி வைத்திருக்கிறது என்ற கேள்விகள் எழுந்தன. ஆனால் உக்ரைன் தரப்பிலிருந்து வந்த பதில் தாக்குதலில் பல ரஷ்ய போர் விமானங்கள் தாக்கி அழிக்கப்பட்டதால் அதிர்ச்சி அடைந்தே ரஷ்யா தனது விமானப்படையை போரிலிருந்து விலக்கி வைத்ததாக கூறப்பட்டது.
கருங்கடலுக்குப் பக்கத்தில்.. “பொருளாதார ஹப்”.. பக்கா பிளான்.. ரஷ்யாவின் சூப்பர் ஸ்கெட்ச்!
விமானப்படையை பயன்படுத்தாமல் உக்ரைனுக்குள் முன்னேறி வந்ததால் ரஷ்ய ராணுவத்துக்கு பெரும் பாதிப்பு ஏற்பட்டது. பெருமளவிலான உயிரிழப்பும் ஏற்பட்டது. இந்த நிலையில் தற்போது மீண்டும் விமானப்படையை முழு வீச்சில் ரஷ்யா பயன்படுத்த ஆரம்பித்துள்ளதாக உக்ரைன் ராணுவம் தெரிவித்துள்ளது. கடந்த 24 மணி நேரத்தில் உக்ரைன் வான்வெளியில், ரஷ்ய விமானங்கள் அதிக அளவில் புழங்குவதாக உக்ரைன் தெரிவித்துள்ளது.
இதுகுறித்து உக்ரைன் விமானப்படை வட்டாரத்தில் கூறுகையில், அதிக அளவிலான ஆளில்லா போர் விமானங்களை
ரஷ்ய விமானப்படை
பயன்படுத்துகிறது. மேலும் குண்டு வீச்சு விமானங்கள், தாக்குதல் விமானங்கள், போர் விமானங்கள், ஏவுகணைகள், பாலிஸ்டிக் ஏவுகணைகளையும் அதிக அளவில் பயன்படுத்த ஆரம்பித்துள்ளது ரஷ்யா என்று தெரிவிக்கப்பட்டுள்ளது.
ஆத்தாடி.. என்னா அடி.. உக்ரைன் செம உக்கிரம்.. உருக்குலைந்து போன ரஷ்ய வாகனங்கள்!
இதற்கிடையே திங்கள்கிழமை நடந்த உக்ரைன் பதில் தாக்குதலில் ஒரு ரஷ்ய விமானம், 2 ஹெலிகாப்டர்கள், 6 டிரோன்கள் தாக்கி அழிக்கப்பட்டதாக உறுதிப்படுத்தப்படாத செய்திகள் தெரிவிக்கின்றன. ரஷ்யாவின் பல்வேறு போர் விமானங்களை தாக்கி அழித்துள்ளதாக உக்ரைன் கூறினாலும் கூட இதுவரை எந்த ஆதாரத்தையும் அது வெளியிடவில்லை என்பது குறிப்பிடத்தக்கது.
இந்த நிலையில், ரஷ்ய படையினரின் வேகத்தை உக்ரைன் படையினர் தடுத்து வெற்றியை நோக்கி நெருங்கி வருவதாக உக்ரைன் அதிபர் விலாடிமிர் ஜெலன்ஸ்கி கூறியுள்ளார். இதுதொடர்பாக அவர் வெளியிட்டுள்ள வீடியோ உரையில், ரஷ்யப் படையினரின் வேகத்தை உக்ரைன் படையினர் தடுத்து வருகின்றனர். ரஷ்யாவின் முன்னேற்றத்தை குறைத்து வருகின்றனர். கார்கிவ் பகுதியில் ஒரு ரஷ்ய போர் விமானம் தாக்கி அழிக்கப்பட்டது. விரைவில் உக்ரைன் வெற்றி பெறும். வெற்றியை நோக்கி நாம் நெருங்கி வருகிறோம் என்றார் ஜெலன்ஸ்கி.