அண்மையில் நடந்து முடிந்த உத்தரப்பிரதேசம், உத்தரகாண்ட், மணிப்பூர், கோவா, பஞ்சாப் ஆகிய 5 மாநில சட்டமன்றத் தேர்தல்களில் பஞ்சாப்பை தவிர்த்து மற்ற 4 மாநிலங்களில் பாஜக மீண்டும் ஆட்சியை தக்க வைத்துக்கொண்டுள்ளது. டெல்லியை தொடர்ந்து மொத்தம் 117 தொகுதிகளை கொண்ட அண்டை மாநிலமான பஞ்சாப் மாநிலத்தில் ஆம் ஆத்மி கட்சி ஆட்சியை பிடித்துள்ளது.
ஆம் ஆத்மி கட்சியின் முதல்வர் வேட்பாளர்
பகவந்த் மான்
58,206 வாக்குகள் பெற்று சாதனை வெற்றியை பதிவு செய்தார். இதையடுத்து, அம்மாநில முதல்வராக சுதந்திர போராட்ட வீரர் பகத்சிங்கின் சொந்த கிராமத்தில் அவர் பதவியேற்றுக் கொண்டார். தேர்தல் பிரசாரத்தின் போது பல்வேறு வாக்குறுதிகளை ஆம் ஆத்மி கட்சி அளித்திருந்தது. மேலும், டெல்லி மாடல் என்பதை முன்னிறுத்தி அக்கட்சி மேற்கொண்ட பிரசாரமே ஆம் ஆத்மிக்கு வெற்றியை ஈட்டித்தந்ததாகவும் கூறப்படுகிறது.
தொடர்ந்து, முதல்வராக பொறுப்பேற்றது முதலே பல்வேறு அதிரடி அறிவிப்புகளை பகவந்த் மான் வெளியிட்டு வருகிறார். அந்த வரிசையில், பஞ்சாபில் தற்காலிக அரசுப் பணியாளர்களாக இருக்கும் 35 ஆயிரம் பேரை நிரந்தரப் பணியாளர்களாக மாற்ற முடிவெடுக்கப்பட்டுள்ளதாக முதல்வர் பகவந்த் மான் அறிவித்துள்ளார்.
இதுகுறித்து வெளியிடப்பட்டுள்ள அறிவிப்பில் கூறியிருப்பாதாவது: “பஞ்சாப் மாநிலத்தில் குரூப் சி மற்றும் குரூப் டி பிரிவுகளில் பணிபுரிந்து வரும் 35,000 தற்காலிக பணியாளர்களை நிரந்தரப் பணியாளர்களாக மாற்ற முடிவெடுக்கப்பட்டுள்ளது. மேலும், இனி வரும் காலங்களில் தற்காலிக ஒப்பந்த முறையிலும், வெளி நிறுவனங்கள் மூலம் பணியாளர்களை தேர்வு செய்யும் முறைகளை முடிவுக்கு கொண்டு வருமாறு தலைமைச் செயலாளரிடம் அறிவுறுத்தியுள்ளேன்.” என்று கூறப்பட்டுள்ளது.