டெல்லி, பஞ்சாபில் ஆட்சியமைத்து சாதனை படைத்துள்ள
ஆம் ஆத்மி
கட்சி அடுத்து குஜராத் மாநிலத்துக்குக் குறி வைத்துள்ளது. குஜராத் மாநிலத்திற்கு அரவிந்த் கெஜ்ரிவாலும், பகவந்த் மானும் வருகை தருகின்றனர்.
ஆம் ஆத்மி கட்சி ஆரம்பித்த பின்னர் முதல் வெற்றியாக டெல்லியில் ஆட்சியைப் பிடித்தது. அக்கட்சியின் சார்பில் முதல் முதல்வரானார்
அரவிந்த் கெஜ்ரிவால்
. அதன் பின்னர் சமீபத்தில்
பஞ்சாப்
மாநிலத்தில் ஆட்சியைப் பிடித்து அனைவரையும் அசர வைத்தது ஆம் ஆத்மி கட்சி. அக்கட்சி சார்பில்
பகவந்த் மான்
முதல்வரானார்.
இந்த நிலையில் அடுத்த கட்டமாக குஜராத்தில் ஆட்சியைப் பிடிக்க ஆம் ஆத்மி கட்சி தீர்மானித்துள்ளது. இதற்கான முயற்சிகளை அது தொடங்கி விட்டது. இந்த ஆண்டு இறுதியில் குஜராத் மாநில சட்டசபைக்குத் தேர்தல் நடைபெறவுள்ளது. இதற்கான முன்னேற்பாடுகளில் ஆம் ஆத்மி கட்சி இப்போதே இறங்கி விட்டது. தொடர்ந்து பல்வேறு நிகழ்ச்சிகளையும், விழிப்புணர்வு பிரசாரங்களையும் அது குஜராத்தில் முன்னெடுக்கவுள்ளது.
கடந்த 1995ம் ஆண்டு குஜராத் மாநிலம் காங்கிரஸ் கட்சியிடமிருந்து பாஜக வசம் வந்தது. அன்று முதல் அது பாஜகவிடம்தான் இருந்து வருகிறது. இடையில் பல முதல்வர்கள் வந்து போய் விட்டனர். ஆனாலும் மக்கள் தொடர்ந்து பாஜகவுக்கே வாக்களித்து வருகின்றனர். ஆனால் பாஜகவின் செல்வாக்கில் அங்கு சற்று தொய்வு ஏற்பட்டிருப்பதாக பலரும் கூறுகின்றனர்.
இந்த நிலையில்தான் ஆம் ஆத்மி, குஜராத் மாநிலத்தைக் குறி வைத்துள்ளது. இதன் பொருட்டு டெல்லி முதல்வர் கெஜ்ரிவாலும், பஞ்சாப் முதல்வர் பகவந்த் மானும் குஜராத் வந்துள்ளனர். 2 நாள் பயணமாக அவர்கள் அகமதாபாத் வந்து சேர்ந்துள்ளனர்.
இன்று அவர்கள் சபர்மதி ஆசிரமம் செல்லவுள்ளனர். அதன் பின்னர் வாகனப் பேரணியை நடத்தவுள்ளனர். “திரங்கா யாத்திரை” என்று இதற்குப் பெயரிடப்பட்டுள்ளது. அதைத் தொடர்ந்து நாளை அகமதாபாத்தில் உள்ள சுவாமிநாராயணன் கோவிலுக்கு செல்லவுள்ளனர்.
சமீபத்தில் டெல்லியில் கெஜ்ரிவால் வீட்டில் பெரும் தாக்குதலை பாஜகவினர் நடத்தினர். வீட்டு கேட்டை அடித்து உடைத்தனர். மோசமாக நடந்து கொண்டனர். கெஜ்ரிவாலைக் கொல்ல பாஜகவினர் திட்டமிட்டிருந்ததாக ஆம் ஆத்மி கட்சியினர் புகார் கூறியுள்ளனர். இந்த சம்பவம் நாடு முழுவதும் பெரும் பரபரப்பை ஏற்படுத்தியது. இதையடுத்து தற்போது குஜராத் வந்துள்ள கெஜ்ரிவாலுக்கு பலத்த பாதுகாப்பு கொடுக்க போலீஸாருக்கு குஜராத் ஆம் ஆத்மி கட்சி கோரிக்கை விடுத்துள்ளது.
குஜராத் சட்டசபையில் 182 இடங்கள் உள்ளன. அனைத்திலும் ஆம் ஆத்மி தனித்துப் போட்டியிடும் என ஏற்கனவே கெஜ்ரிவால் அறிவித்துள்ளார். கடந்த மார்ச் மாதம் நடந்த உள்ளாட்சித் தேர்தலில் ஆம் ஆத்மி கட்சி அனைவரையும் வியக்க வைக்கும் வகையில் செயல்பட்டது. 31 தாலுகா பஞ்சாயத்து இடங்கள், 9 நகராட்சிகள், 2 மாவட்ட பஞ்சாயத்து இடங்களில் அக்கட்சி வெற்றி பெற்றது.
கடந்த 2017 சட்டசபைத் தேர்தலில்தான் முதல் முறையாக போட்டியிட்டது ஆம் ஆத்மி கட்சி. 29 இடங்களில் போட்டியிட்டு அனைத்திலும் டெபாசிட்டை இழந்தது. ஆனால் அந்தத் தேர்தலில் கெஜ்ரிவால் பிரசாரம் செய்யவில்லை. ஆனால் இந்த முறை விட்டதையும் சேர்த்துப் பிடிக்க அது திட்டமிட்டுள்ளது. கடந்த ஆண்டு நடந்த உள்ளாட்சித் தேர்தலுக்குப் பின்னர் அது சூரத்தில் வாகனப் பேரணியை நடத்தியது.
மறுபக்கம் பாஜகவும் தேர்தலுக்கான ஆயத்தப் பணிகளில் ஏற்கனவே இறங்கி விட்டது. ஆம் ஆத்மி கட்சியை நாங்கள் ஒரு பொருட்டாகவே நினைக்கவில்லை. அது காங்கிரஸுக்குத்தான் போட்டி என்று பாஜக கூறியுள்ளது.
அடுத்த செய்திகாங்கிரஸ் சாதனையை முறியடித்த பாஜக!