மும்பை: மும்பை அருகே மூன்று கார்கள் ஒன்றுடன் ஒன்று மோதிக் கொண்டதில் நடிகை மலாய்கா அரோரா படுகாயமடைந்தார். தற்போது அவருக்கு மருத்துவமனையில் சிகிச்சை அளிக்கப்பட்டு வருகிறது. பாலிவுட் நடிகையும், மாடல் அழகியுமான மலாய்கா அரோரா, நேற்று மாலை மும்பையில் நடந்த நிகழ்ச்சி ஒன்றில் கலந்து கொண்டார். இதுதொடர்பாக புகைப்படங்களை தனது இன்ஸ்டாகிராம் பக்கத்தில் பதிவிட்டுள்ளார். நிகழ்ச்சி முடிந்த பின்னர் மும்பை – புனே சாலையில் காரில் சென்ற போது விபத்தில் சிக்கிக் கொண்டார். இதுகுறித்து கோபோலி இன்ஸ்பெக்டர் ஷிரிஷ் பவார் கூறுகையில், ‘மும்பை – புனே விரைவுச் சாலையில் பாலிவுட் நடிகை மலாய்கா அரோரா காரில் சென்றார். கோபோலி என்ற இடத்தில் மூன்று வாகனங்கள் ஒன்றுடன் ஒன்று மோதியதில், மூன்று வாகனங்களும் சேதமடைந்தன. அந்த காரின் ஒன்றில் நடிகையும் இருந்தார். இரண்டு காருக்கு நடுவில் நடிகையின் கார் சிக்கிக் கொண்டது. அதனால் மீட்புப் பணிகள் தாமதமாகின. மலாய்காவுக்கு நெற்றி மற்றும் கண் அருகே காயங்கள் ஏற்பட்டுள்ளது. விபத்துக்கு காரணமான வாகன ஓட்டிகள் அங்கிருந்து தப்பிவிட்டனர். காயமடைந்த மலாய்கா அரோரா அங்கிருந்து மீட்கப்பட்டு நவிமும்பையில் உள்ள தனியார் மருத்துவமனையில் சேர்க்கப்பட்டார். விபத்து எப்படி நடந்தது என்பது குறித்து வழக்கு பதிந்து விசாரித்து வருகிறோம்’ என்றார். முன்னதாக மலாய்கா அரோரா, நடிகர் அர்பாஸ் கானை திருமணம் செய்து கொண்டார். இவர்களுக்கு அர்ஹான் என்ற மகன் உள்ளார். தம்பதிகள் இருவரும் 2017ல் முறைப்படி விவாகரத்து பெற்றுக் கொண்டனர். தற்போது அர்ஜுன் கபூருடன் மலாய்கா அரோரா டேட்டிங் செய்து வருகிறார் என்பது குறிப்பிடத்தக்கது.