உத்தரப் பிரதேசத்தில் நடந்த சட்ட மேலவை தேர்தலில் பாஜக பெரும் வெற்றி பெற்றது. அதேசமயம், பிரதமர் நரேந்திர மோடியின் சொந்தத் தொகுதியான வாரணாசியில் அது தோல்வியைத் தழுவி 3வது இடத்தைப் பிடித்துள்ளது பாஜகவினரை அதிர்ச்சிக்குள்ளாக்கியுள்ளது.
சமீபத்தில்தான் சட்டசபைக்கு தேர்தல் நடந்தது. அதில் அபார வெற்றி பெற்று மீண்டும் ஆட்சியமைத்தது
யோகி ஆதித்யநாத்
தலைமையிலான பாஜக அரசு. இந்த நிலையில் அங்கு 36 சட்ட மேலவைத் தொகுதிகளுக்கு தேர்தல் நடந்தது. .இந்தத் தேர்தலிலும் பாஜக அபார வெற்றி பெற்றுள்ளது.
33 தொகுதிகளை அது வென்றுள்ளது. மற்ற 3 இடங்கள் பிற கட்சிகளுக்குப் போயுள்ளது. இதில் ஒரு இடம்
வாரணாசி
என்பது குறிப்பிடத்தக்கது. வாரணாசி தொகுதியில் உள்ளூர் பிரபலமான பிரிஜேஷ் சிங் என்பவரின் மனைவி அன்னபூர்ணா சிங் போட்டியிட்டார். அவரே வெற்றியும் பெற்றார். மிகப் பெரிய வெற்றியை அவர் பெற்றார். பாஜக 3வது இடத்துக்குத் தள்ளப்பட்டது.
அதேசமயம், முதல்வர் யோகி ஆதித்யநாத்தின் சொந்த தொகுதியான கோரக்பூரில் பாஜக வெற்றி பெற்று விட்டது. ஆக, பிரதமர் தொகுதியில் தோல்வியுற்று, முதல்வர் தொகுதியில் வென்றுள்ளது பாஜக. கடந்த 2016 தேர்தலில் இதே தொகுதியில் பிரிஜேஷ் சிங் சுயேச்சையாகப் போட்டியிட்டு வெற்றி பெற்றார். அத்தேர்தலில் பாஜக போட்டியிடவில்லை. ஆனால் இந்த முறை போட்டியிட்டு 3வது இடத்துக்கு அது தள்ளப்பட்டுள்ளது.
இந்த ஒரு தோல்விதான் பாஜகவினரை சோர்வடைய வைத்து விட்டது. மற்றபடி 33 தொகுதிகளில் வென்றதால் பாஜகவினர் உற்சாகத்துடன் இந்த வெற்றியைக் கொண்டாடி வருகின்றனர். இத்தேர்தலில் சமாஜ்வாதிக் கட்சிக்கு எந்த சீட்டும் கிடைக்கவில்லை. எம்.பிக்கள், எம்எல்ஏக்கள், உள்ளூர் கவுன்சிலர்கள், கிராம பிரதிநிதிகள் ஆகியோரே இந்தத் தேர்தலில் வாக்களித்தனர் என்பது குறிப்பிடத்தக்கது.