இந்தியப் பிரதமர்களாக பதவி வகித்த 14 பேர் குறித்த மியூசியத்தை பிரதமர்
நரேந்திர மோடி
தொடங்கி வைத்துள்ளார். அப்போது, பெரும்பாலான பிரதமர்கள் எளிய குடும்பப் பின்னணி கொண்டவர்கள் என்று பெருமையுடன் கூறினார் நரேந்திர மோடி.
சட்ட மேதை அம்பேத்கரின் பிறந்த நாள் இன்று நாடு முழுவதும் கொண்டாடப்பட்டது. இதையொட்டி டெல்லியில் ஒரு அருங்காட்சியகம் திறக்கப்பட்டுள்ளது. முன்னாள் பிரதமர்கள் குறித்த விவரங்கள், புகைப்படங்கள் உள்ளிட்டவை இதில் இடம் பெற்றுள்ளன.
இந்த அருங்காட்சியகத்தைத் தொடங்கி வைத்து முதல் டிக்கெட்டையும் பெற்று உள்ளே நுழைந்து
பிரதமர் மோடி
பார்வையிட்டார். அங்கு அமர்ந்து புகைப்படங்களையும், தகவல்களையும் பார்த்து மகிழ்ந்தார்.
பின்னர் அவர் பேசுகையில், இந்தியாவின் பெரும்பாலான பிரதமர்கள் சாதாரண குடும்பத்திலிருந்து வந்தவர்கள் என்பது நாட்டுக்கும், மக்களுக்கும் பெருமை தரக் கூடியதாகும். நமது அரசியல்சாசனத்தின் சிற்பி பாபாசாஹேப் அம்பேத்கர். நமது நாடாளுமன்ற நடைமுறைகளின் அடித்தளம் அதுதான்.
மத்தியில் அமைந்த ஒவ்வொரு அரசும் நமது நாடு இன்றைய நிலைக்கு உயர்வதற்காக பல்வேறு வழிகளில் உழைத்துள்ளது. இந்த நேரத்தில் இப்படி ஒரு அருங்காட்சியகம் அமைந்திருப்பது பொருத்தமானது. நாடு சுதந்திரமடைந்து 75 ஆண்டுகள் ஆகியுள்ள நிலையில், பல அருமையான தருணங்களை நமது நாடு சந்தித்துள்ளது. வரலாற்றில் அதி முக்கியத்துவம் வாய்ந்தவை இவை.
நமது நாட்டின் பிரதமர்கள், நாட்டை பல்வேறு சவால்களிலிருந்து மீட்டு உயரத்திற்குக் கொண்டு செல்ல உதவியுள்ளனர். ஒவ்வொருவரும் ஒரு விதமான திறமையும், தகுதியும் கொண்டவர்கள். அவர்கள் என்றென்றும் மக்களின் மனதில் வாழ்வார்கள். இந்த
பிரதமர் அருங்காட்சியகம்
எதிர்கால சந்ததிகளுக்கு ஊக்க சக்தியாக அமையும் என்றார் அவர்.