பிரபல இயக்குனர், தயாரிப்பாளர் டி.ராமாராவ் மறைவு
தயாரிப்பாளரும், இயக்குனருமான டி.ராமாராவ்(83) சென்னையில் உடல்நலக் குறைவால் காலமானார். தமிழில் விஜய் நடித்த யூத், விக்ரம் நடித்த தில், அருள், ஜெயம் ரவி நடித்த உனக்கும் எனக்கும், விஷால் நடித்த மலைக்கோட்டை போன்ற படங்களை தயாரித்தவர் ராமாராவ். தெலுங்கு, ஹிந்தியிலும் படங்கள் தயாரித்துள்ள
இவர் இரு மொழிகளிலும் ஏராளமான படங்களை இயக்கியும் உள்ளார். குறிப்பாக தர்மேந்திரா, அமிதாப் பச்சன் உள்ளிட்ட பல நடிகர்களின் வெற்றி படங்களை இயக்கி உள்ளார். ஹிந்தியில் ரஜினி ஹீரோவாக நடித்த அந்த கானூன் என்ற படத்தை இயக்கியதும் இவர் தான். தெலுங்கு, ஹிந்தியில் படங்களை இயக்கிய இவர் தமிழில் ஒரு படம் கூட இயக்கவில்லை.
சென்னை, தி.நகரில் வசித்து வந்த இவர் வயது மூப்பு மற்றும் உடல்நலக் குறைவால் காலமானார். இவருக்கு தாதினேனி ஜெயஸ்ரீ என்ற மனைவியும், சாமுண்டீஸ்வரி, நாக சுசீலா, அஜய் ஆகிய குழந்தைகளும் உள்ளனர். மாலையில் இறுதிச்சடங்கு நடக்கிறது. இவரது மறைவுக்கு திரைப்பிரபலங்கள் பலரும் இரங்கல் தெரிவித்துள்ளனர்.