திரைப்பட நடிகர், நடிகைகள், அரசியல் தலைவர்கள் உள்ளிட்டவர்கள் மீதுள்ள ஈர்ப்பால் அவர்களுக்கு கோயில் கட்டுவதும், தங்களுக்கு சொந்தமான இடங்களுக்கு அவர்களது பெயர்களை வைப்பது வழக்கமான ஒன்றாக இருக்கிறது. இந்த நிலையில்,
பாஜக
தொண்டர் ஒருவர் தான் கட்டிய புது வீட்டுக்கு பிரதமர் மோடியின் பெயரை சூட்டி அந்த வரிசையில் இணைந்துள்ளார்.
கர்நாடக மாநிலம் தாவங்கரே மாவட்டத்தை சேர்ந்தவர்
கவுடர் ஹலேஷ்
(56). பாஜக தொண்டரான இவர்,
பிரதமர் மோடி
மற்றும் உள்துறை அமைச்சர் அமித் ஷா ஆகியோரின் தீவிர ஆதரவாளர் ஆவார். கவுடர் ஹலேஷ் தனது நிலத்தில் புதிய வீடு ஒன்றை தற்போது கட்டியுள்ளார். அதற்கு ‘
நரேந்திர மோடி நிலையம்
’ என்று அவர் பெயர் சூட்டியுள்ளார்.
புதிய வீட்டுக்கு சத்ரபதி சிவாஜியின் பெயரை சூட்டவே அவரது குடும்பத்தினர் விருப்பம் தெரிவித்துள்ளனர். ஆனால், மோடியின் மேல் உள்ள ஈர்ப்பால் அவரது பெயரை புதிய வீட்டுக்கு சூட்டியுள்ளார் கவுடர் ஹலேஷ். மேலும், வீட்டின் முகப்பு கல்வெட்டில் மோடியின் முகத்தையும் அவர் பொறித்து வைத்துள்ளார்.
இந்த வீட்டின் திறப்பு விழா வருகிற 3ஆம் தேதி நடைபெறவிருக்கிறது. புதிய வீட்டை சென்னகிரி பாஜக எம்எல்ஏ மாடல் விருப்பாக்ஷப்பா திறந்து வைக்க உள்ளார். வீட்டின் திறப்பு விழாவுக்கான அழைப்பிதழை கர்நாடக முதல்வர் பசவராஜ் பொம்மை, பிரதமர் மோடி, அமித் ஷா ஆகியோருக்கு கவுடர் ஹலேஷ் அனுப்பி வைத்துள்ளார்.
“பிரதமர் நரேந்திர மோடியின் தீவிர ரசிகனாக இருபப்தால், எனது வீட்டிற்கு அவரது பெயரை வைத்துள்ளேன். வீட்டின் முன்பக்கத்தில் அவருடைய படத்தையும் வைத்துள்ளேன்.” என்று மகிழ்ச்சி பொங்க கவுடர் ஹலேஷ் தெரிவித்துள்ளார். உண்மையில் ஆஸ்திரேலியாவில் வசிக்கும் மகளுக்காகவே அவர் இந்த வீட்டை கட்டியுள்ளதாக கூறப்படுவதற்கிடையே, நரேந்திர மோடி நிலையத்தின் புகைப்படங்கள் தற்போது சமூக வலைதளங்களில் வைரலாகி வருகிறது.