இந்தியாவில் ஒரே மாதத்தில் 88 லட்சம் வேலைவாய்ப்புகள்.. CMIE தகவல்!

வேலையிழப்பு

கொரோனா தொற்று காலத்தில் பலர் வேலைவாய்ப்புகளை இழந்தது, இந்த ஆண்டு தொடக்கம் முதல் பல ஸ்டார்ட்அப் நிறுவனங்கள் ஊழியர்களை பணியை விட்டு நீக்கியது போன்ற காரணங்களால் வேலையின்மை அதிகரித்து இருந்தது. ஜனவரி முதல் மார்ச் வரையிலான காலாண்டில் 12 மில்லியன் நபர்கள் வேலைவாய்ப்பை இழந்துள்ளனர்.

புதிய வேலைவாய்ப்புகள் எப்படி அதிகம்?

இப்போது கொரோனா தொற்று குறைந்து மீண்டும் பல நிறுவனங்கள் ஊழியர்களை மீண்டும் அலுவலகத்துக்கு அழைத்துள்ளன. மேலும் பல நிறுவனங்கள் புதிதாக ஊழியர்களை பணிக்கு எடுப்பதும் அதிகரித்துள்ளது எனவே ஏப்ரல் மாதம் புதிதாக 88 லட்சம் வேலைவாய்ப்புகள் உருவாகியுள்ளதாகத் தெரிவிக்கப்பட்டுள்ளது. இதன் மூலம் இந்தியாவின் தொழிலாளர் எண்ணிக்கை 8.8 மில்லியன் அதிகரித்து 437.2 மில்லியனாக உள்ளது.

 

துறைவாரியான நிலவரம்

ஏப்ரல் மாத சேவை துறையில் 67 லட்சம் வேலைவாய்ப்புகள் உருவாகியுள்ளன. தொழில்துறையில் 55 லட்சம் வேலைவாய்ப்புகள் உருவாகியுள்ளன. அதில் 30 லட்சம் வேலைவாய்ப்புகள் உற்பத்தித் துறையிலும், 40 லட்சம் கட்டுமான துறையிலும் உருவாகியுள்ளது.

விவசாயத் துறை

அதே நேரம் 54 லட்சம் வேலைவாய்ப்புகள் விவசாயத் துறையில் ஏப்ரல் மாதம் சரிந்துள்ளது என இந்திய பொருளாதார கண்காணிப்பு மையம் வெளியிட்டுள்ள தரவுகள் மூலம் தெரியவந்துள்ளது. அதற்கு அறுவடை காலம் முடிவடைந்தது, கோதுமை உற்பத்தி குறைந்ததும் காரணம் என கூறுகின்றனர்.

கவனம் தேவை

தின கூலிகள் மற்றும் சிறு வணிக நிறுவனங்களில் இந்த உயர்வு அதிகமாக இருந்ததால், புதிய தொழில்துறை வேலைகள் சிறந்த தரமாக இருக்க வாய்ப்பில்லை என்று அறிக்கை கூறுகிறது.

வேலையின்மை விகிதம்

இந்தியாவில் வேலையின்மை விகிதம், மார்ச் மாதம் இருந்த 7.60 சதவீதத்திலிருந்து ஏப்ரல் மாதம் 7.83 சதவீதமாக அதிகரித்துள்ளது என இந்தியப் பொருளாதார கண்காணிப்பு மையம் (CMIE) அண்மையில் தெரிவித்து இருந்தது. இந்தியாவில் அதிகபட்சமாக ஹரியானாவில் வேலையின்மை விகிதம் 34.5 சதவீதமாகவும், ராஜஸ்தானில் 28.8 சதவீதமாகவும் உள்ளது. தமிழ்நாட்டில் மார்ச் மாதம் ஆறுதல் அளிக்கும் விதமாக 4.1 சதவீதமாக இருந்த வேலையின்மை விகிதம் 3.2 சதவீதமாகக் குறைந்துள்ளது.